கோவையில் 7 தொகுதிகளில் திமுக - அதிமுக நேரடி மோதல்
கோவை மாவட்டத்தில் உள்ள பத்து தொகுதிகளில் அதிமுக 9 தொகுதிகளிலும், திமுக 7 தொகுதிகளிலும் போட்டியிடுகின்றன. அதில் 7 தொகுதிகளில் திமுக - அதிமுக நேரடி மோதல்
சட்டமன்ற தேர்தலை முன்னிட்டு அரசியல் கட்சிகள் வேட்பாளர்களை அறிவித்து வருகின்றன. முக்கிய கட்சிகளான திமுக, அதிமுக கட்சிகள் தமது கூட்டணி கட்சிகளுடன் தொகுதி பங்கீடு முடித்து, வேட்பாளர்களை அறிவித்துள்ளன. இதன்படி கோவை மாவட்டத்தில் உள்ள பத்து தொகுதிகளில் அதிமுக 9 தொகுதிகளிலும், திமுக 7 தொகுதிகளிலும் போட்டியிடுகின்றன.
கோவை தெற்கு தொகுதியை இரு கட்சிகளும் கூட்டணிக்கு ஒதுக்கியுள்ளன. இங்கு காங்கிரஸ், பாஜக வேட்பாளர்களை எதிர்த்து மநீம தலைவர் கமல்ஹாசன் போட்டியிடுகிறார். மேட்டுப்பாளையம், கவுண்டம்பாளையம், தொண்டாமுத்தூர், கோவை வடக்கு, சிங்காநல்லூர், கிணத்துக்கடவு, பொள்ளாச்சி ஆகிய 7 தொகுதிகளில் திமுக, அதிமுக இருகட்சிகளும் நேரடியாக மோதுகின்றன. திமுக கூட்டணியில் உள்ள கொங்குநாடு மக்கள் தேசியக் கட்சி சூலூர் தொகுதியிலும், இந்திய கம்யூனிஸ்ட் கட்சி வால்பாறை தொகுதியிலும் அதிமுகவை எதிர்த்து களமிறங்குகிறது.