பொங்கல் விடுமுறையையொட்டி திருச்சி வண்ணத்து பூச்சி பூங்காவில் குவிந்த மக்கள்

பொங்கல் விடுமுறையையொட்டி திருச்சி வண்ணத்துப்பூச்சி பூங்காவில் மக்கள் அதிக அளவில் குவிந்தனர்.

திருச்சி மாவட்டத்தில் மக்கள் சுற்றுலா நோக்கில் பொழுதை கழிக்க முக்கொம்பு உள்பட பல்வேறு இடங்கள் உள்ளன. மேலும் ஆன்மிகம் சார்ந்த ஸ்ரீரங்கம் ரங்கநாதர் கோவில், மலைக்கோட்டை உச்சிப்பிள்ளையார் கோவில், சமயபுரம் மாரியம்மன் கோவில் ஆகியவையும் உள்ளன.

இது மட்டுமல்லாமல் அறிவியல் மையங்கள், சுற்றுலா தளங்கள் என பலவகையான இடங்கள் இன்னும் திருச்சி மக்களுக்கே தெரியாமல் ஒரு சில இடங்களும் மறைந்திருக்கின்றன. இவ்வாறு இருக்க அனைத்து திருச்சி மக்களாலும் நன்கு அறியப்பட்டது திருச்சி மேலூரில் உள்ள வண்ணத்துப்பூச்சி பூங்கா ஆகும். ஜெயலலிதா திருச்சி மாவட்டம் ஸ்ரீரங்கம் சட்டமன்ற தொகுதியில் இருந்து தேர்ந்தெடுக்கப்பட்டு தமிழக முதல்வராக பதவி வகித்த போது இந்த வண்ணத்து பூச்சி பூங்கா திறக்கப்பட்டது.

இந்த வண்ணத்துப்பூச்சி பூங்காவில் ஒவ்வொரு வாரமும் செவ்வாய்க்கிழமை விடுமுறை விடப்படும். இந்நிலையில் நேற்று பொங்கல் பண்டிகையும், இன்று மாட்டுப்பொங்கல் பண்டிகையும் கொண்டாடப்படுவதால் இன்று திறந்திருக்கும் என ஏற்கனவே நிர்வாகம் சார்பில் அறிவிக்கப்பட்டிருந்தது. இந்த பூங்காவானது தமிழ்நாடு அரசு வனத்துறையின் சார்பில் நிர்வகிக்கப்பட்டு வருகிறது. இது ஆசியாவின் மிகப்பெரிய வண்ணத்துப்பூச்சி பூங்காவாகும்.

இன்று விடுமுறை நாள் என்பதால் காலை முதலே வண்ணத்துப்பூச்சி பூங்காவில் மக்கள் கூட்டம் அதிகரிக்க தொடங்கியது. இதன் காரணமாக திருச்சி மாவட்டம் மட்டும் இன்றி சுற்று வட்டார பகுதிகளை  சேர்ந்த மக்கள் ஏராளமானோர் வண்ணத்துப்பூச்சி பூங்காவில் குவிந்தனர். அவர்கள் அனைவரும் தங்களது குழந்தைகளையும் அழைத்து வந்திருந்தனர். குழந்தைகளுக்கு என இந்த பூங்காவில் விளையாட்டு பூங்கா உள்ளது. இதில் குழந்தைகள் அனைவரும் விளையாடி மகிழ்ந்தனர்.

பொங்கல் பண்டிகைக்கு மறுநாள் எப்போதுமே அனைத்து பகுதிகளில் கூட்டம் அதிகளவில் காணப்படும். இன்று வண்ணத்துப்பூச்சி பூங்கா திறக்கப்பட்டிருந்ததால் தொடர்ந்து மக்கள் கூட்டம் அதிகளவில் காணப்பட்டது. மேலும் இங்கு சிறுவர்களுக்கான படகு குழாம் இருப்பதால் குழந்தைகள் அனைவரும் மகிழ்ச்சியுடன் இந்த பூங்காவிற்கு வந்தனர்.

இந்த பூங்காவானது மொத்தம் 25 ஏக்கர் பரப்பளவில் அமைந்துள்ளது. இந்த வண்ணத்துப்பூச்சி பூங்காவை மக்கள் பார்வையிட பெரியவர்களுக்கு 10 ரூபாயும், 10 வயதுக்குட்பட்ட குழந்தைகளுக்கு 5 ரூபாயும், ஒளிப்படக் கருவிக்கு 20 ரூபாயும் கட்டணமாக வசூலிக்கப்பட்டு வருகிறது.

மேலும் வாகன நிறுத்தக்கட்டணமாக மிதிவண்டிக்கு 5 ரூபாயும், இருசக்கர வாகனங்களுக்கு 10 ரூபாயும், மகிழுந்துக்கு 20 ரூபாயும், சிற்றுந்து பேருந்துகளுக்கு 75 ரூபாயும் இங்கு கட்டணமாக வசூலிக்கப்பட்டு வருகிறது என்பது  குறிப்பிடத்தக்கது.