ஸ்ரீரங்கத்தில் கறிக்கடைக்கு தீ வைத்தவர் கைது

ஸ்ரீரங்கம் ஆர்.எஸ்.ரோடு பகுதியை சேர்ந்தவர் ஜாகிர்உசேன். இவர் ஸ்ரீரங்கம் மீன் மார்க்கெட் பகுதியில் கறிக்கடை வைத்துள்ளார். இவரது மகன் அப்பாஸ் (வயது 25), சற்று மனநிலை பாதிக்கப்பட்டவர். இந்நிலையில் கடந்த 31-ம் தேதி வீட்டு முன் நின்றிருந்த அப்பாஸை அதே பகுதியை சேர்ந்த 2 பேர் போதையில் தாக்கியுள்ளனர். இதையடுத்து அவர் மருத்துவமனையில் சிகிச்சை பெற்று வீடு திரும்பினார்.

இந்நிலையில் கடந்த 8-ம் தேதி அப்பாஸ்க்கு வயிற்று வலி ஏற்பட்டதால் ஸ்ரீரங்கம் அரசு மருத்துவமனையில் அனுமதிக்கப்பட்டார். இது குறித்து தந்தை ஜாகீர் உசேன் அளித்த புகாரின் பேரில் வழக்கு பதிவு செய்துள்ள ஸ்ரீரங்கம் போலீசார் வாலிபர் அப்பாஸை தாக்கிய அதே பகுதியை சேர்ந்த அஜித் (வயது 25), மோகன்ராஜ் (வயது 24) ஆகிய 2 பேரை கைது செய்து சிறையில் அடைத்தனர்.

இந்நிலையில் அதே பகுதியை சேர்ந்த ராஜேஷ் (24) என்பவர் நண்பர்கள் சிறை சென்றதை தாங்க முடியாமல் நேற்று இரவு ஜாகிர்உசேனின் கறிக்கடையை தீ வைத்து எரித்தார். இதையடுத்து ராஜேஷை கைது செய்த ஸ்ரீரங்கம் போலீசார் நீதிமன்றத்தில் ஆஜர்ப்படுத்தி சிறையில் அடைத்தனர்.