விமானத்தில் திருச்சி வரும் மதிமுக வேட்பாளருக்கு வரவேற்பு அளிக்க ஏற்பாடு

தி.மு.க. கூட்டணியில் திருச்சி நாடாளுமன்ற தொகுதி ம.தி.மு.க.விற்கு ஒதுக்கப்பட்டு உள்ளது. இதனை தொடர்ந்து திருச்சி நாடாளுமன்ற தொகுதி ம.தி.மு.க. வேட்பாளராக அக்கட்சியின் முதன்மை செயலாளர் துரை வைகோ அறிவிக்கப்பட்டார்.

துரை வைகோ வேட்பாளராக அறிவிக்கப்பட்டதும் தனது தந்தையார் வைகோவுடன் அறிவாலயத்திற்கு சென்று தி.மு.க. தலைவரும், தமிழக முதல் அமைச்சருமான மு.க. ஸ்டாலினை சந்தித்து துரை வைகோ வாழ்த்து பெற்றார். மேலும் கூட்டணி கட்சி தலைவர்களையும் சந்தித்து பேசி உள்ளார்.

இந்நிலையில் துரை வைகோ நாளை சென்னையில் இருந்து விமானம் மூலம் திருச்சி வருகிறார். காலை 9 மணிக்கு திருச்சி வரும் அவருக்கு விமான நிலையத்தில் திமுக கூட்டணி கட்சிகள் சார்பில் பிரமாண்டமான வரவேற்பு அளிக்கப்பட உள்ளது.

இது தொடர்பாக திருச்சி மாநகர் மாவட்ட ம.தி.மு.க. செயலாளர் வெல்லமண்டி  சோமு வெளியிட்டு உள்ள அறிக்கையில் நமது வெற்றி வேட்பாளர் துரை வைகோ அவர்கள் நாளை காலை விமானம் மூலம் திருச்சி வருகிறார். அவருக்கு திருச்சி விமான நிலையத்தில் அளிக்கப்படும் வரவேற்பில் மதிமுக  மற்றும் கூட்டணி கட்சியினர் திரளாக கலந்து கொண்டு சிறப்பிக்கும் படி வேண்டுகோள் விடுத்துள்ளார்.