திருச்சி எம்எல்ஏ-வான தனக்கு இம்முறை சீட் மறுக்கப்பட்டது குறித்து தமிழக முதல்வரிடம் பெண் எம்எல்ஏ கண்ணீர் விட்டு அழுதார்.
சொந்த ஊர் செல்வதற்காக சென்னையிலிருந்து விமானம் மூலம் தமிழக முதல்வர் எடப்பாடி பழனிச்சாமி, துணை முதல்வர் பன்னீர்செல்வம் ஆகியோர் நேற்று இரவு திருச்சி வந்தனர். அவர்களை திருச்சி விமான நிலையத்தில் திருச்சி மாவட்ட அதிமுக வேட்பாளர்கள் குமார், வெல்லமண்டி நடராஜன், இந்திராகாந்தி, பத்மநாதன், பரஞ்ஜோதி, கிருஷ்ணன் உள்ளிட்ட பலர் வரவேற்பு அளித்தனர். திருச்சி மாவட்டம் மண்ணச்சநல்லூர் தொகுதியில் கடந்த 2016 ம் ஆண்டு தேர்தலில் வெற்றி பெற்று தற்போது எம்எல்ஏ வாக இருக்கும் பரமேஸ்வரி முருகனுக்கு இம்முறை வாய்ப்பு வழங்கப்படாமல் முன்னாள் அமைச்சரான பரஞ்சோதிக்கு மண்ணச்சநல்லூர் தொகுதியில் போட்டியிட வாய்ப்பு வழங்கப்பட்டுள்ளது. அதேபோன்று ஸ்ரீரங்கம் தொகுதியில் கடந்த தேர்தலில் போட்டியிட்டு வெற்றி பெற்ற அமைச்சரான வளர்மதிக்கு இம்முறை சீட் வழங்கப்படவில்லை.
அவருக்கு பதிலாக முன்னாள் அமைச்சரான கு.ப. கிருஷ்ணனுக்கு வாய்ப்பு வழங்கப்பட்டுள்ளது. இந்நிலையில் திருச்சி விமான நிலையத்தில், பரமேஸ்வரி முருகன் தனக்கு இந்த தேர்தலில் வாய்ப்பு வழங்காதது குறித்து கண்ணீருடன் முதலமைச்சரிடம் முறையிட்டார். அப்போது முதல்வர் அவருக்கு ஆறுதல் கூறி அனுப்பி வைத்தார். இது குறித்து பேசிய பரமேஸ்வரி முருகன் தனக்கு வாய்ப்பு தந்தாலும், தராவிட்டாலும் முதல்வருக்கு விசுவாசமாக இருப்பேன் என்றார். பெண் எம்எல்ஏ தனக்கு மீண்டும் வாய்ப்பு வழங்கப்படாதது குறித்து முதலமைச்சரிடம் கண்ணீர் விட்டு அழுதது அ.தி.மு.க வட்டாரத்தில் பரபரப்பை ஏற்படுத்தி உள்ளது.