பரமத்திவேலூர்: டிராக்டர் மோதி டூ வீலரில் சென்றவர் பலி - 2 பேர் காயம்

ஈரோடு மாவட்டம் அம்மாப்பேட்டையை சேர்ந்தவர் நாகராஜ் ( 56) எலக்ட்ரீசியன். இவரது மகன் பிரபு (30). இவர்கள் 2 பேரும் சம்பவத்தன்று இரவு ஜேடர்பாளையத்திற்கு சென்றனர். பின்னர் மீண்டும் அம்மாப்பேட்டைக்கு மோட்டார்சைக்கிளில் திரும்பிச்சென்றனர்.

ஜமீன்இளம்பள்ளி அருகே, கரும்பு லோடு ஏற்றிச் சென்ற டிராக்டரை முந்தி செல்ல முயன்றனர். அப்போது எதிரே வந்த மற்றொரு மோட்டார் சைக்கிள் மீது,  அவர்கள் சென்ற மோட்டார் சைக்கிள் மோதியது. இதில் மோட்டார்சைக்கிளின் பின்னால் அமர்ந்து சென்ற நாகராஜ் டிராக்டரில் சிக்கி படுகாயம் அடைந்தார்.

பிரபுவும், மற்றொரு மோட்டார் சைக்கிளில் வந்த, கரூர் மாவட்டம் சேமங்கியை சேர்ந்த தியாகு (36) ஆகியோரும் படுகாயம் அடைந்தனர். அவர்கள் 3 பேரையும் அங்கிருந்தவர்கள் மீட்டு திருச்செங்கோடு அரசு ஆஸ்பத்திரியில் சேர்த்தனர். அங்கு சிகிச்சை பலனின்றி நாகராஜ் உயிழந்தார்.

படுகாயம் அடைந்த பிரபு திருச்செங்கோடு அரசு ஆஸ்பத்திரியிலும், தியாகு கோவையில் உள்ள ஒரு தனியார் ஆஸ்பத்திரியிலும் சிகிச்சை பெற்று வருகின்றனர். இந்த விபத்து குறித்து ஜேடர்பாளையம் போலீசார் வழக்குப்பதிவு செய்து டிராக்டர் டிரைவர் பெரியசாமியை (47) கைது செய்து விசாரணை நடத்தி வருகின்றனர்.