பரமத்தி வேலூர் அருகே வாகனத்தில் ரேஷன் அரிசி கடத்திய இளைஞர் கைது

நாமக்கல் குடிமை பொருள் வழங்கல் குற்ற புலனாய்வுத்துறை போலீசார் மற்றும் உள்ளூர் போலீசார் பரமத்திவேலூர்- மோகனூர் ரோட்டில் உள்ள குப்புச்சிபாளையம் பஸ் ஸ்டாப் அருகில் வாகன சோதனையில் ஈடுபட்டனர். அப்போது அந்த வழியாக வந்த சரக்கு வாகனம் ஒன்றை நிறுத்தி சோதனை செய்தபோது அதில் ரேசன் அரிசி கடத்தி வந்தது தெரியவந்தது. இதைத் தொடர்ந்து வாகனத்தில் 22 பிளாஸ்டிக் சாக்கு மூட்டைகளில் இருந்த 1,100 கிலோ ரேசன் அரிசியை போலீசார் பறிமுதல் செய்தனர். மேலும் சரக்கு வாகனமும் பறிமுதல் செய்யப்பட்டது.

அந்த வாகனத்தை ஓட்டி வந்த அதன் உரிமையாளர் பாலப்பட்டி இந்திரா நகரை சேர்ந்த தினேஷ்குமார் (32) என்பவரை போலீசார் கைது செய்து விசாரணை நடத்தி வருகின்றனர்.