பெருந்துறை அருகே பேருந்து மோதி பெண் பலி

பெருந்துறை அடுத்துள்ள விஜயமங்கலம் மூங்கில்பாளையம் பகுதியை சேர்ந்தவர் முத்து சரவணன். இவர் மனைவி சசிகலா (வயது 64). சம்பவத்தன்று கணவன்-மனைவி 2 பேரும் மூங்கில்பாளையத்திலிருந்து விஜயமங்கலம் வருவதற்காக தனது மோட்டார்சைக்கிளில் சென்று கொண்டிருந்தனர். விஜயமங்கலம் ஊத்துக்குளி பிரிவு அருகே வந்து கொண்டிருந்த போது கோவையிலிருந்து சேலம் நோக்கி சென்று கொண்டிருந்த அரசு பஸ் மோட்டர்சைக்கிளில் மீது எதிர்பாராத விதமாக மோதியது. இதில் பின்னால் அமர்ந்திருந்த சசிகலா நிலைதடுமாறி கீழே விழுந்ததில் பஸ் டயர் அவர் மீது ஏறியது.

உடனடியாக, அக்கம் பக்கத்தினர் 2 பேரையும் மீட்டு ஈரோட்டில் உள்ள தனியார் மருத்துவமனைக்கு ஆம்புலன்ஸ் மூலம் அனுப்பி வைத்தனர். பின்னர் மேல் சிகிச்சைக்காக கோவையில் உள்ள தனியார் மருத்துவமனைக்கு அனுப்பி வைத்தனர். அங்கு சிகிச்சை பலனின்றி சசிகலா பரிதாபமாக உயிரிழந்தார். பலத்த காயங்களுடன் அடிபட்ட முத்து சரவணன் சிகிச்சை பெற்று வருகிறார். இந்த விபத்து குறித்து பெருந்துறை போலீஸ் சப்-இன்ஸ்பெக்டர் செந்தில் குமார் வழக்குப்பதிவு செய்து விசாரணை மேற்கொண்டு வருகிறார்.