ஈரோடு மாவட்டம் தாளவாடி அருகே ஜெலட்டின் குச்சிகளை கடத்தியவர் கைது

தாளவாடி அருகே இருசக்கர வாகனத்தில் ஜெலட்டின் குச்சிகள் கடத்திய நபரை போலீசார் கைது செய்து ஜெலட்டின் குச்சிகள் மற்றும் இருசக்கர வாகனத்தை பறிமுதல் செய்தனர்.

ஈரோடு மாவட்டம் சத்தியமங்கலம் அடுத்த தாளவாடி அருகே உள்ள ஓசூர் பிரிவு சாலையில் தாளவாடி போலீசார் வாகன சோதனையில் ஈடுபட்டிருந்தனர். அப்போது அந்த வழியாக வந்த இருசக்கர வாகனத்தை தடுத்து நிறுத்தி சோதனை செய்தனர். 

சோதனையில், அவரிடம் 125 கிராம் எடையிலான 39 ஜெலட்டின் குச்சிகள் மற்றும் 11 அலுமினிய குப்பிகள் இருந்ததை கண்டுபிடித்தனர். விசாரணையில், அவர் தாளவாடி ஓசூர் கிராமத்தை சேர்ந்த ரங்கசாமி (வயது 47) என்பதும், வெடி பொருட்களை அரசு அனுமதி இன்றியும், உரிமம் இல்லாமலும் சட்ட விரோதமாக கடத்தி சென்றது தெரியவந்தது.

இதனையடுத்து, போலீசார் அவரை கைது செய்தனர் . பின்னர், அவரிடம் இருந்து ஜெலட்டின் குச்சிகள் மற்றும் இருசக்கர வாகனத்தை பறிமுதல் செய்தனர். மேலும், இதுதொடர்பாக போலீசார் விசாரிக்கின்றனர்.