குவாரிகளை திறக்க வேண்டும் : மணல் லாரி உரிமையாளர்கள் கோரிக்கை
குவாரிகளை மீண்டும் திறந்து குறைந்த விலையில் மணல் வழங்க வேண்டும் என மணல் லாரி உரிமையாளர்கள் கோரிக்கை விடுத்துள்ளனர்.
அதன்பின் கடந்த 2017 ஜூன் மாதம் முதல், இணையதளம் மூலம் முன்பதிவு செய்பவர்களுக்கு நேரடியாக மணல் வினியோகம் செய்யும் முறை அமல்படுத்தப்பட்டது. 2017 ஆம் ஆண்டு ஆகஸ்டு முதல் கடந்த ஏப்ரல் மாதம் வரை 4 ஆண்டுகளில் 6 குவாரிகள் மட்டுமே இயக்கப்பட்டன. மற்ற அனைத்து மணல் குவாரிகளும் நிறுத்தி வைக்கப்பட்டன. இதனால் தினமும் 2,500 யூனிட் மணல் மட்டுமே வழங்கப்பட்டது.
ஆனால் தமிழகத்திற்கு தினமும் குறைந்தபட்சம் 60,000 யூனிட் மணல் தேவைப்படுகிறது. மணல் தட்டுப்பாட்டை பயன்படுத்தி, அனுமதியின்றி ஆறுகளில் திருட்டு மணல் எடுத்து யூனிட் ரூ.15,000 முதல் ரூ.20,000 வரை விற்பனை செய்கின்றனர். மேலும் கேரளா , ஆந்திரா போன்ற மாநிலங்களில் இருந்து ஒரு யூனிட் மணல் ரூ.8,000த்துக்கு வாங்கி தமிழகத்தில் ரூ.20,000 வரை விற்பனை செய்கின்றனர்.
மணல் தட்டுப்பாடு மற்றும் கடும் விலை உயர்வால் ஏழை, எளிய, நடுத்தர மக்கள் பாதிக்கப்பட்டுள்ளனர். மணல் லாரிகள், லோடு இல்லாததால், நிதி நிறுவனங்களிடம் வாங்கிய கடனுக்கு தவணைத் தொகையை திருப்பி செலுத்த முடியாமல் உள்ளனர். எனவே மணல் தட்டுப்பாட்டை தவிர்த்திட நிறுத்தி வைக்கப்பட்ட மணல் குவாரிகளை உடனடியாக இயக்க வேண்டும்.
திருச்சி, கரூர், நாமக்கல் மாவட்டங்களில், காவிரி மற்றும் பிற மாவட்டங்களில் உள்ள ஆறுகளிலும், புதிய மணல் குவாரிகளை திறக்க, தமிழக முதல்வர் நடவடிக்கை எடுக்க வேண்டும் என தெரிவிக்கப்பட்டுள்ளது.