பவானிசாகர் வனப்பகுதியில் இறந்து கிடந்த பெண் யானை

Erode news, Erode news today- பவானிசாகர் வனப்பகுதியில் 20 வயது மதிக்கத்தக்க பெண் யானை ஒன்று இறந்து கிடந்தது.

ஈரோடு மாவட்டம் சத்தியமங்கலம் புலிகள் காப்பகத்துக்கு உட்பட்ட பவானிசாகர் வனப்பகுதி சுஜில்குட்டை வனப்பகுதியில் வனத்துறையினர் நேற்று காலை ரோந்து சென்றனர். அப்போது, வனப்பகுதியில் ஒரு காட்டு யானை இறந்து கிடந்ததை கண்டனர்.

இதுகுறித்து உடனே வனத்துறை உயர் அதிகாரிகளுக்கு தகவல் கொடுக்கப்பட்டது. அதன்பேரில் மாவட்ட வன அதிகாரி (பொறுப்பு) சுதாகர், வனச்சரக அலுவலர் சிவக்குமார், வன கால்நடை மருத்துவர் சதாசிவம் ஆகியோர் சம்பவ இடத்துக்கு சென்று யானையை பார்வையிட்ட போது பெண் யானை இறந்து கிடந்தது தெரியவந்தது. இதனையடுத்து, யானையின் உடல் பிரேத பரிசோதனை செய்தனர்.

இதுகுறித்து வனத்துறையினர் கூறுகையில், இறந்து கிடந்த பெண் யானைக்கு சுமார் 20 வயது இருக்கும், உடற்கூறு பரிசோதனை அறிக்கையின் முடிவில் தான் யானை எப்படி இறந்தது? என்று தெரியவரும் என்றார். அதனைத் தொடர்ந்து, யானையின் உடல் மற்ற விலங்குகளுக்கு உணவாக அங்கேயே விடப்பட்டது.