அந்தியூரில் யானை தந்தங்கள் கடத்திய 4 பேர் கைது

அந்தியூர் வனப்பகுதியில் யானை தந்தங்கள் கடத்திய 4 பேரை வனத்துறையினர் கைது செய்தனர். 

ஈரோடு வனக்கோட்டத்துக்கு உட்பட்ட அந்தியூர் வனச்சரகத்தைச் சேர்ந்த வனத்துறையினர் நேற்று முன்தினம் (16ம் தேதி) மாலை ரோந்துப் பணியில் ஈடுபட்டிருந்தனர். மைக்கேல்பாளையம் பீட் பகுதியில் உள்ள குருநாதசுவாமி கோயில் அருகே சென்றபோது அந்த வழியாக ஒரு கார் வந்தது.

இதனால் சந்தேகம் அடைந்த வனத்துறையினர் அந்த காரை தடுத்து நிறுத்தினர். பின்னர் காரை சோதனையிட்டனர். அதில் 12.700 கிலோ எடை கொண்ட 4 யானை தந்தங்கள் இருந்தன. அதைத்தொடர்ந்து காரில் இருந்த 4 பேரிடம் விசாரணை நடத்தினர்.

விசாரணையில் அவர்கள் நாமக்கல்லைச் சேர்ந்த ஆர்.குணசேகரன் (வயது 34), கடலூரைச் சேர்ந்த சாந்தப்பா (வயது 50), சேலத்தைச் சேர்ந்த கே.சின்னக்கண்ணன் (வயது 45), கோவையைச் சேர்ந்த ஜி.செந்தில்குமார் (வயது 43) ஆகியோர் என்பதும், இவர்கள் 4 பேரும் தந்தங்களை கடத்தி கோவைக்கு விற்பனைக்காக கொண்டு சென்றதும் தெரியவந்தது.

இதைத்தொடர்ந்து அவர்கள் 4 பேரையும் போலீசார் கைது செய்தனர். இதையடுத்து அவர்களிடம் இருந்து 4 தந்தங்கள் மற்றும் கார் பறிமுதல் செய்யப்பட்டன. மேலும் இதில் தொடர்புடைய 2 பேரை வனத்துறையினர் தேடி வருகின்றனர். அவர்கள் பிடிபட்டால் தான் யானை தந்தங்கள் கடத்தல் குறித்து முழு விவரம் தெரியவரும் என்று வனத்துறையினர் தெரிவித்தனர்.