பெண் குழந்தைகளை ஆபாசமாக சித்தரித்து பாடல்: கானா பாடகர் சரவெடி சரண் கைது

சென்னை பெரம்பூர் அடுத்த செம்பியம் பகுதியை சேர்ந்த பிரபல கானா பாடகர் சரவணன் என்கிற சரவெடி சரண் என்பவர் டோனி ராக் எ போட்டி கானா என்ற பெயரில் ஒரு வீடியோ 2020 மார்ச் மாதம் வெளியாகியிருக்கிறது. அதில் சரவெடி சரண் மற்றும் டோனி ராக் ஆகிய இரு கானா பாடகர்கள் பாடல் பாடுகின்றனர்.

குருவிக் கூடு மண்டையுடன் சரவெடி சரண் பாடும் பாடலில் உள்ள வரிகள், சிறுமிகளை ஆபாசமாக சித்தரிக்கிறது. "மஜாவாக மாட்டிக்கிச்சு எனக்கு ஏத்த லடுக்கி (சிறுமி)… பால்வாடியில வாங்கி கொடுத்தேன் பூந்திய, எட்டாவது பாஸாயிட்டு எடுக்க வச்சேன் வாந்தியை." என பாடியுள்ள பாடலை தனது யூடியூப் பதிவேற்றம் செய்து இருந்தார். அந்தப் பாடல் சமூக வலைதளங்களில் வைரல் ஆகி வந்து இருந்த நிலையில் திருவள்ளூர் மாவட்ட காவல்துறை கண்காணிப்பாளர் வருண் குமார் பார்த்து அவர் மீது நடவடிக்கை எடுக்க சைபர் கிரைம் காவல்துறைக்கு உத்தரவிட்டிருந்தார்.

அவரின் உத்தரவின்பேரில் கானா பாடகர் சரவெடி சரண் சைபர்கிரைம் காவல்துறையினர் சென்னையில் அவரை கைது செய்து திருவள்ளூர் காவல் நிலையத்திற்கு அழைத்து வந்தனர். குழந்தைகளை பாலியல் ரீதியாக தவறாக சித்தரிக்கும் வீடியோ பரப்புவதால் அவர் மீது 67b தொழில்நுட்ப பிரிவின்கீழ் வழக்கு பதிவு செய்து கைது செய்தனர். அதன் பின்னர் அவரிடம் இரண்டு மணி நேரம் விசாரணைக்கு பின்னர் மாவட்ட காவல்துறை கண்காணிப்பாளர் அறிவுரை வழங்கி எச்சரித்து செய்து மன்னிப்பு கடிதம் பெற்று காவல் நிலைய பிணையில் அவரை விடுவித்தார்.

தான் பாடிய பாடல் யார் மனதும் புண்படுத்தி இருந்தால் மன்னிப்பு கேட்டுக் கொள்வதாகவும் கானா பாடகர் சரவெடி சரண் வெளியிட்டுள்ள வீடியோ பதிவில் தெரிவித்துள்ளார். மேலும் போக்சோ சட்டத்தின் 16-வது பிரிவின் படி சிறார்களுக்கு எதிரான குற்றச் செயல்கள் நடக்க தூண்டுபவர்களையும் போக்சோ சட்டத்தில் கைது செய்யலாம். என மாவட்ட எஸ்.பி.வருண்குமார் எச்சரித்துள்ளார்.