நாமக்கல் லோக்சபா தொகுதியில் 8,526 வாக்காளர்கள் புதிதாக சேர்ப்பு: மொத்த வாக்காளர் 14,52,562 பேர்

Namakkal news, Namakkal news today- நாமக்கல் லோக்சபா தொகுதியில், புதியதாக 8,526 வாக்காளர்கள் சேர்க்கப்பட்டுள்ளனர். மொத்த வாக்காளர்களின் எண்ணிக்கை 14 லட்சத்து, 52 ஆயிரத்து, 562 ஆக அதிகரித்துள்ளது.

நாமக்கல் மாவட்டத்தில், 2023, அக்., 27 ல், வரைவு வாக்காளர் பட்டியில் வெளியிடப்பட்டது. அதில், மாவட்டத்தில் உள்ள ராசிபுரம், சேந்தமங்கலம், நாமக்கல், ப.வேலூர், திருச்செங்கோடு, குமாரபாளையம் என 6 சட்டசபை தொகுதிகளில் மொத்த வாக்காளர்கள், 14 லட்சத்து, 19 ஆயிரத்து, 643 பேர்.

தொடர்ந்து, 28 ஆயிரத்து 892 பேர் புதிதாக வாக்காளர் பட்டியலில் சேர்க்கப்பட்டனர். அதையடுத்து, கடந்த, ஜன. 22ல் மொத்த வாக்காளர்கள் 14 லட்சத்து, 32 ஆயிரத்து 307 பேர். தற்போது, லோக்சபா தேர்தலையொட்டி, 18 வயது நிரம்பியவர்கள், விடுபட்டவர்கள் என, 8,629 பேர் வாக்காளர் பட்டியில் புதியதாக பெயர் சேர்க்கப்பட்டனர். அதையடுத்து, தற்போதைய நிலவரப்படி, மாவட்டத்தின் மொத்த வாக்காளர்கள், 14 லட்சத்து, 40 ஆயிரத்து, 996 பேர்.

நாமக்கல் லோக்சபா தொகுதிக்கு உட்பட்ட, சங்ககிரி, ராசிபுரம், சேந்தமங்கலம், நாமக்கல், ப.வேலூர் திருச்செங்கோடு என, 6 சட்டசபை தொகுதியில், 14 லட்சத்து, 44 ஆயிரத்து, 36 பேர் வாக்காளர் பட்டியில் இடம் பெற்றிருந்தனர்.

லோக்சபா தேர்தலையொட்டி, புதிதாக, 8,526 பேர் சேர்க்கப்பட்டனர். தொடர்ந்து, தற்போதைய நிலவரப்படி, நாமக்கல் லோக்சபா தொகுதியில், மொத்த வாக்காளர்கள் எண்ணிக்கை 14 லட்சத்து, 52 ஆயிரத்து, 562 பேர் என அதிகரித்துள்ளது.