நாமக்கல்லில் நாளை கூட்டுறவு பணியாளர்களுக்கான குறைதீர்க்கும் நாள் கூட்டம்

நாமக்கல் மாவட்ட கூட்டுறவு பணியாளர்கள் குறைதீர்க்கும் நாள் கூட்டம் நாளை நடைபெறுகிறது.

இது குறித்து நாமக்கல் மாவட்ட கூட்டுறவு சங்கங்களின் இணை பதிவாளர் அருளரசு வெளியிட்டுள்ள செய்திக்குறிப்பில் கூறியுள்ளதாவது:-

தமிழக முதலமைச்சர் உத்தரவின்படி, கூட்டுறவுத்துறையின் கீழ் செயல்படும், கூட்டுறவு சங்கங்களின் பணியாளர்களுக்கான குறைகளை தீர்வு செய்யும் வகையில், 2 மாதங்களுக்கு ஒரு முறை மண்டல அளவில் “பணியாளர் நாள்” நிகழ்வு நடத்தப்படும் என கூட்டுறவுத்துறை மானிய கோரிக்கையில், கூட்டுறவுத்துறை அமைச்சர் அறிவித்தார். அதைத் தொடர்ந்து நாமக்கல் மண்டலத்தில், கூட்டுறவு சங்கங்களின் பதிவாளர் அறிவுரைப்படி 2 மாதங்களுக்கு ஒரு முறை, 2வது வெள்ளிக்கிழமை அன்று, நாமக்கல் மாவட்டத்தில் உள்ள கூட்டுறவுத்துறையின் கீழ் செயல்படும் கூட்டுறவு நிறுவனங்களின் பணியாளர்களின் குறை தீர்க்கும் “பணியாளர் நாள்” கூட்டம் நடத்தப்பட உள்ளது.

இதையொட்டி “பணியாளர் நாள் முகாம்” நாளை 12ம் தேதி மாலை 4 மணிக்கு, நாமக்கல் மாவட்ட கலெக்டர் ஆபீசில் 2வது தளத்தில் உள்ள, மண்டல கூட்டுறவு இணைப்பதிவாளர் அலுவலகத்தில் நடைபெறவுள்ளது. கூட்டுறவு பணியாளர்கள் மற்றும் ஓய்வு பெற்ற பணியாளர்கள் தங்கள் குறைகள் தொடர்பான விண்ணப்பங்களை http:/rcs.tn.gov.in என்ற வெப்சைட்டில் ஆன்லைன் மூலம் பதிவேற்றம் செய்யலாம். அவ்வாறு பதிவிட இயலாதவர்கள் கூட்டத்தில் கலந்துகொண்டு விண்ணப்பங்களை நேரடியாக வழங்கலாம். அந்த விண்ணப்பங்கள் நிகழ்ச்சியின்போதே ஆன்லைனில் பதிவேற்றம் செய்யப்பட்டு 2 மாதங்களுக்குள் தீர்வு செய்யப்படும்.

நாமக்கல் மாவட்டத்தில், கூட்டுறவுத்துறையில் பணிபுரிந்து வரும் மற்றும் ஓய்வு பெற்ற அனைத்து நிலை பணியாளர்களும் தங்களுக்கு ஏதேனும் குறை இருப்பின்,நாளை நடைபெறும் பணியாளர் நாள் கூட்டத்தில் கலந்துகொண்டு பயன்பெறலாம் என்று தெரிவித்துக்கொள்ளப்பட்டுள்ளது.