சேலத்தில் இருந்து நாமக்கல் வழியாக மயிலாடுதுறை செல்லும் ரயிலில் கூடுதல் பெட்டிகள்..!

சேலத்தில் இருந்து நாமக்கல் வழியாக மயிலாடுதுறை செல்லும் பயணிகள் வசதிக்காக ரயிலில் கூடுதல் பெட்டிகள் இணைக்கப்பட்டுள்ளன.

நாமக்கல் :

சேலத்தில் இருந்து நாமக்கல் வழியாக மயிலாடுதுறை வரை செல்லும் பாசஞ்சர் ரயிலில், பயணிகள் வசதிக்காக கூடுதல் பெட்டிகள் இணைக்கப்பட்டுள்ளது.

இது குறித்து, தென்னக ரயில்வே வெளியிட்டுள்ள செய்திக்குறிப்பில் கூறியுள்ளதாவது:

தென்னக ரயில்வேயில், தற்போது தலா 8 பெட்டிகளுடன் இயக்கப்படும் 5 பாசஞ்சர் ரெயில்களில், பயணிகள் வசதிக்காக, அக். 1 முதல் 31 வரை 12 கூடுதலாக 4 பெட்டிகள் இணைக்கப்பட்டு இயக்கப்படுகிறது. இதையொட்டி சேலத்தில் இருந்து ராசிபுரம், நாமக்கல், மோகனூர், கரூர், திருச்சி வழியாக மயிலாடுதுறை வரை செல்லும் பாசஞ்சர் ரெயில் (ரயில் எண். 16811/16812) மற்றும் மயிலாடுதுறையில் இருந்து திருச்சி, கரூர், மோகனூர், நாமக்கல், ராசிபுரம் வழியாக சேலம் செல்லும் பாசஞர் ரயில் ஆகியவற்றில் இனி 8 பெட்டிகளுக்கு பதிலாக 12 பெட்டிகள் இணைக்கப்படும். இந்த ரயிலில் பயணிகள் ஏற்றிச்செல்லும் திறன் 50 சதவீதம் அதிகரிக்கப்படுவதால், இதுவரை 800 இருக்கை வசதிகள் கொண்ட இந்த ரயிலில் இனி 1,200 இருக்கைகளாக அதிகரிக்கும் என தெரிவிக்கப்பட்டுள்ளது.