போக்குவரத்து கழகம் சார்பில் சாலை பாதுகாப்பு வாரம்

அரசு போக்குவரத்துக்கழக சார்பில் சாலை பாதுகாப்பு வாரம் அனைத்து கிளைகளிலும் கடைபிடிக்கப்பட்டதாக தமிழ்நாடு அரசு போக்குவரத்துக்கழகம் மேலாண்மை இயக்குனர் ஜோசப் டயஸ் தெரிவித்துள்ளார். 

இது குறித்து அவர் விடுத்துள்ள செய்தி குறிப்பில் தமிழ்நாடு அரசு போக்குவரத்துக்கழக விழுப்புரம் கோட்டத்தின் சார்பில் கடந்த 11-ந் தேதி முதல் 17-ந் தேதி வரை விழுப்புரம், கடலூர், திருவண்ணாமலை, காஞ்சீபுரம், வேலூர், திருவள்ளூர் ஆகிய மண்டலம் மூலம் சாலை பாதுகாப்பு வாரம் கடைபிடிக்கப்பட்டது.

அதன்படி, விழுப்புரம் மாவட்டத்தில் சாலை பாதுகாப்பு குறித்து பொதுமக்களுக்கு விழிப்புணர்வு ஏற்படுத்தும் வகையில் நெடுஞ்சாலைகளில் பயணிக்கும் வாகனங்களின் பின்புறம் பிரதிபலிப்பு பட்டை ஒட்டுதல், பேருந்துகளில் பயணிக்கும் பயணிகளுக்கு சாலை பாதுகாப்பு குறித்து விழிப்புணர்வு துண்டு பிரசுரம், சாலை பாதுகாப்பு குறித்து உறுதிமொழி போன்றவை மேற்கொள்ளப்பட்டது.

மேலும் அனைத்து மண்டலங்களிலும் உள்ள கிளைகளில் பேருந்து ஓட்டுநர்கள், நடத்துநர்களுக்கான கண் பரிசோதனை முகாமும், கண்காட்சி வாகனத்தின் மூலம் பள்ளி- கல்லூரி மாணவ, மாணவிகளுக்கு சாலை பாதுகாப்பு குறித்த விழிப்புணர்வும் ஏற்படுத்தப்பட்டது.

சுங்கச்சாவடிகளில் இரவு நேரத்தில் போக்குவரத்துக்கழக ஓட்டுநர்களுக்கு பிஸ்கட், தேநீர் வழங்கி சாலை பாதுகாப்பு துண்டு பிரசுரம் வழங்கப்பட்டு பாதுகாப்பான இயக்கம் குறித்து நெறிமுறைகளை கடைபிடித்து பேருந்துகளை இயக்க அறிவுரை வழங்கப்பட்டது.

இதுதவிர பேருந்து நிலையங்களில் பாதுகாப்பான இயக்கம் குறித்து அனைத்து நாட்களிலும் ஆலோசனை வழங்கப்பட்டது என தெரிவித்துள்ளார்.