வேலூர் அருகே வீட்டின் பூட்டு உடைத்து 36 சவரன் நகை திருட்டு

 வேலூர் அடுத்த புதுவசூர் கே.ஜி.என் நகரை சேர்ந்தவர் விஜயராகவன் ( 38 ) , தனியார் மருத்துவமனையில் மேலாளராக பணியாற்றி வருகிறார் . இவரது மனைவி கவிதா . இவர் திருவண்ணாமலையில் ஆரம்ப சுகாதார நிலையத்தில் நர்சாக பணிபுரிந்து வருகிறார் . இந்நிலையில் , கவிதாவுக்கு உடல்நலக் குறைவு ஏற்பட்டதால், மனைவியை பார்ப்பதற்கு கடந்த 19ம் தேதி வீட்டை பூட்டி விட்டு திருவண்ணாமலைக்கு சென்று, அங்கேயே தங்கி உள்ளார் .

இதற்கிடையில் , விஜயராகவனின் வீட்டின் பூட்டு உடைக்கப் பட்டுள்ளதாக அக்கம், பக்கத்தினர் தகவல் தெரிவித்தனர் . இதன்பேரில் விஜயராகவன் , வீட்டிற்கு வந்து பார்த்தபோது மர்மநபர்கள் வீட்டின் பூட்டு உடைத்து பீரோவில் இருந்த 36 சவரன் தங்க நகைகளை திருடிச்சென்றது தெரியவந்தது . இதுகுறித்து , சத்துவாச்சாரி போலீசில் புகார் செய்தார் . அதன்பேரில் போலீசார் சம்பவ இடத்தில் விசாரணை நடத்தினர் . மேலும் தடயவியல் நிபுணர்கள் மூலம் தடயங்கள் சேகரித்தனர் . மேலும் வழக்குப் பதிவு செய்து நகை திருடி சென்ற மர்ம ஆசாமிகளை போலீசார் தேடி வருகின்றனர் .

கடந்த 17 ம் தேதி சத்துவாச்சாரி வாரியார் நகரில் வாட்டர் சப்ளை செய்யும் காதர்மெய்தீன் என்பவரின் வீட்டை உடைத்து 5 சவரன் நகை மற்றும் ரூபாய் 50 ஆயிரம் பணத்தை மர்ம ஆசாமிகள் திருடிச்சென்றனர் . ஒரே வாரத்தில் சத்துவாச்சாரி காவல் நிலைய எல்லைக்கு உட்பட 2 வீடுகளில் நகை , பணம் திருடி சென்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது .