எருமப்பட்டி அருகே மோட்டார் சைக்கிள் விபத்து: விவசாயி உயிரிழப்பு

நாமக்கல் மாவட்டம், எருமப்பட்டி அருகே உள்ள பொட்டிரெட்டிபட்டி இந்திரா காலனியை சேர்ந்தவர் கங்கா (35). விவசாயி. இவருடைய உறவினரான கருப்பசாமி என்பவர் விபத்தில் காயம் அடைந்து நாமக்கல்லில் உள்ள, ஆஸ்பத்திரியில் சிகிச்சை பெற்று வருகிறார். அவரை பார்ப்பதற்காக கங்கா மோட்டார்சைக்கிளில் அவருடைய தம்பி ஆனந்த் என்பவரை அழைத்துக் கொண்டு நாமக்கல் நோக்கி சென்று கொண்டிருந்தார்.

அப்போது அலங்காநத்தம் அருகே சென்றபோது எதிர்பாராதவிதமாக சாலையின் குறுக்கே வந்த வாலிபர் ஒருவர் மீது மோட்டார் சைக்கிள் மோதியது. இதனால் மோட்டார்சைக்கிளில் இருந்து கீழே விழுந்த கங்காவிற்கு தலையில் பலத்த காயம் ஏற்பட்டது. ஆனந்த் காயம் அடைந்தார். 2 பேரையும் அங்கிருந்தவர்கள் மீட்டு நாமக்கல் அரசு ஆஸ்பத்திரிக்கு சிகிச்சைக்காக அனுப்பி வைத்தனர். அங்கு சிகிச்சை பலனின்றி கங்கா இறந்தார். இதுகுறித்து எருமப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.