ஸ்ரீ பொன்வரதராஜ பெருமாள் கோயில் மரங்கள்வெட்டப்பட்டதாக புகார்: அதிகாரிகள் விசாரணை

Temple Tree Cut Complaint Enquiry

நாமக்கல் மாவட்டம், ராசிபுரத்தில், பிரசித்தி பெற்ற ஸ்ரீ பொன்வரதராஜ பெருமாள் கோயில் உள்ளது. இந்து சமய அறநிலைய துறை அனுமதியின் பேரில், இந்த கோவில் கும்பாபிஷேகம் செய்ய முடிவு செய்யப்பட்டுள்ளது. இதை முன்னிட்டு தற்போது கோவிலில்  திருப்பணிகள் நடைபெற்று வருகின்றன. கோயில் வளாகத்தின் பின்புறம் உள்ள நந்தவனத்தில், பழமை வாய்ந்த அத்தி மரம் தற்போது வெட்டப்பட்டுள்ளது. இந்த மரம் கோயில் பராமரிப்புப் பணி வசதிக்காக வெட்டப்பட்டதாகக் கூறப்படுகிறது. இதேபோல கோயில் முன்பாக உள்ள வன்னி மரத்தின் கிளைகளும் வெட்டப்பட்டுள்ளன. இந்த மரங்கள் முறையான அனுமதியில்லாமல் வெட்டப்பட்டதாகக் கூறப்படுகிறது. இதனையடுத்து அப்பகுதியைச் சேர்ந்தவர்கள் அளித்த புகாரின் அடிப்படையில் மக்கள் தன்னுரிமைக் கட்சி நிறுவனர் நல்வினைச்செல்வன், பாமக நிர்வாகிகள் மோகன்ராஜூ, பாலு, நகர வளர்ச்சி மன்றத் தலைவர் பாலு உள்ளிட்டோர், கோயிலுக்கு சென்று, அப்பகுதியை நேரில் பார்வையிட்டு, வருவாய்த் துறையினர் மற்றும் காவல்துறையினருக்கு தகவல் தெரிவித்தனர்.

இதனையடுத்து ராசிபுரம் காவல் உதவி ஆய்வாளர் தங்கம், வருவாய் ஆய்வாளர் கார்த்திகேயன், கிராம நிர்வாக அலுவலர் சரவணன் உள்ளிட்டோர் நேரில் விசாரணை நடத்தினர். கோயில் நிர்வாக அலுவலர் நந்தகுமாரிடம் இது தொடர்பாக விளக்கம் கேட்டு நடவடிக்கை எடுக்கப்படும் என்று, பொதுமக்களின் புகார் மனுவை பெற்றுக்கொண்ட வருவாய்த் துறை அலுவலர்கள் உறுதியளித்தனர்.