தொலைக்காட்சி வெடித்து 3 வீடுகள் தீ பிடித்து எரிந்தன
தொலைக்காட்சி வெடித்ததில் அடுத்தடுத்து 3 வீடுகள் தீ பிடித்து எரிந்தன.
கன்னியாகுமரி மாவட்டம் நாகர்கோவில் பெண்கள் கிறிஸ்தவ கல்லூரி அருகே உள்ள பகுதியில் வசந்த குமாரி என்பவர் நேற்று இரவு தன் வீட்டில் குடும்பத்தினருடன் தொலைக்காட்சி நிகழ்ச்சிகளை கண்டு கொண்டிருந்தார்.
இரவில் வீட்டிலிருந்த அனைவரும் தூங்கிய நிலையில் தொலைக்காட்சியின் மின் இணைப்பை துண்டிக்காமல் இருந்துள்ளனர். இதனால் நள்ளிரவிலும் இயங்கி கொண்டிருந்த தொலைக்காட்சி, திடீரென வெடித்து தீ பற்றி எரிந்தது. வீடு தீ பிடித்ததில் மின் கசிவும் ஏற்பட்டதால் வசந்த குமாரியின் வீட்டை ஒட்டியுள்ள டேனியல், அந்தோணி ராஜ் ஆகியோரின் வீடுகளிலும் தீ பற்றி எரிந்தது. இது குறித்த தகவல் கிடைத்தும் சம்பவ இடத்திற்கு விரைந்து வந்த தீயணைப்பு மற்றும் மீட்பு பணி வீரர்கள் தீயை அணைத்தனர், இச்சம்பவத்தில் உயிர் சேதம் தவிர்க்கப்பட்ட நிலையில் மின்சாதன பொருட்கள் உட்பட சுமார் 3 லட்சம் மதிப்பிலான பொருட்கள் தீக்கிரையாயின.