கன்னியாகுமரி மாவட்டத்தில் நகை கடையில் கொள்ளையடிக்க திட்டம் தீட்டியதாக 5 பேரை போலீசார் கைது செய்தனர்.
நாகர்கோவில் பகுதியில் கோட்டார் காவல் நிலைய உதவி ஆய்வாளர் ராபர்ட் ஜெயின் மற்றும் தனிப்படையினர் ரோந்து சென்ற போது ஒரு பகுதியில் சிலர் மறைந்து இருந்ததை கண்டுபிடித்தனர். சந்தேகப்படும்படி நின்று கொண்டிருந்த அந்த நபர்களை பிடித்து விசாரித்த போது அவர்கள் கோட்டார் சுற்று வட்டார பகுதியை சேர்ந்த அஜய் கண்ணன்(20), கலைசங்கர்(22), கோகுல்(24), காளியப்பன்(38) மற்றும் சுதன் (26) என்பது தெரியவந்தது. தொடர்ந்து அவர்களிடம் விசாரணை செய்த போது அவர்கள் மீது குமரி மாவட்டத்தில் பல்வேறு காவல் நிலையங்களில் பல வழக்குகள் நிலுவையில் உள்ளது தெரிய வந்தது.
இதனிடையே தற்போது மீனாட்சிபுரம் பகுதியில் உள்ள நகைகடைகளில் திருட திட்டம் தீட்டி, அதற்கான முன்னேற்பாடுகள் செய்த போது பிடிபட்டதும் போலீஸ் விசாரணையில் தெரியவந்தது.இதனை தொடர்ந்து பிடிபட்டோர் மீது வழக்கு பதிவு செய்த போலீசார் அவர்களை கைது செய்து சிறையில் அடைத்தனர். போலீசாரின் அதிரடி நடவடிக்கை மூலம் நடைபெற இருந்த பெரிய திருட்டு சம்பவம் தடுக்கப்பட்டது.