தாளவாடி அருகே தோட்டத்திற்குள் புகுந்து தென்னையை சேதப்படுத்திய யானைகள்

ஈரோடு மாவட்டம் சத்தியமங்கலம் புலிகள் காப்பகத்துக்கு உட்பட்டது ஜீரகள்ளி வனச்சரகம். இந்த வனச்சரகத்துக்கு உட்பட்ட அருளவாடி கிராமத்தை சேர்ந்தவர் லோகேஷ். இவர் தன்னுடைய 2 ஏக்கர் தோட்டத்தில், விவசாயம் செய்து வருகிறார். இந்நிலையில் வனப்பகுதியில் இருந்து வெளியேறிய காட்டு யானைகள்,  லோகேஷின் தோட்டத்துக்குள் புகுந்து 40-க்கும் மேற்பட்ட தென்னை மரங்களை சேதம் செய்தன.

மேலும் 5-க்கும் மேற்பட்ட தென்னை மரங்களையும், தேக்கு மரங்களையும் பிடுங்கி வீசின. இதனை கண்ட விவசாயிகள் பட்டாசுகளை வெடித்து யானையை விரட்ட முயன்றனர். ஆனால் யானைகள் அங்கே முகாமிட்டு தென்னை மரங்களை துவம்சம் செய்தன. இதனால் அப்பகுதி விவசாயிகள் கவலை அடைந்துள்ளனர். இது குறித்து விவசாயிகள் கூறும்போது,  யானைகள் சேதம் செய்த தென்னை மரங்களுக்கு,  அரசு உரிய இழப்பீடு தொகை வழங்க வேண்டும் என கோரிக்கை விடுத்தனர்.