மாணவிக்கு பாலியல் தொல்லை அளித்த பேராசிரியர் பணியிடை நீக்கம்

கோவை பேரூர் பகுதியில் அரசு உதவி பெறும் தவத்திரு சாந்தலிங்க அடிகளார் கலை அறிவியல் கல்லூரி செயல்பட்டு வருகிறது. இக்கல்லூரியில் தமிழ்த்துறையில் இணைப் பேராசிரியராகப் பணியாற்றி வரும் திருநாவுக்கரசு இளங்கலை பயிலும் மாணவி ஒருவரிடம் ஆபாசமாக பேசிய டெலிகிராம் ஸ்கிரீன் ஷாட் பதிவுகள் வெளியாகி அதிர்ச்சியை ஏற்படுத்தியுள்ளது.

அதில் "வீட்ல எல்லாரும் வந்துட்டாங்களா? உன்ன எனக்கு ரொம்ப பிடிக்கும்! பக்கத்துல யாராச்சும் இருக்காங்களா? உன் கண்ணு ரொம்ப அழகா இருக்கு, உன் முகம் ரொம்ப அழகா இருக்கு, நீயும் நானும் இனி ரொம்ப கிளோஸ், நீ என் கூட இருந்தா நல்லா இருக்கும், சமைக்க பழகிக்கோ, தனியா இருக்க போர் அடிக்கலயா, நைட்டுக்கு நான் வரவா, வீட்ல அம்மா இருக்காங்க இல்லாதப்போ சொல்றன் நீ வா, நம்ம ரெண்டு பேரும் தனியா இருக்கும் போது நெறயா பண்ணலாம் என இரவு 9.30 மணிக்கு மேல் பேராசிரியர் திருநாவுக்கரசு பேசுவது போன்ற பதிவுகள் இடம்பெற்றுள்ளன. மேலும் யாராவது அருகில் இருக்கிறார்களா? என பேராசிரியர் திருநாவுக்கரசு கேட்பது போன்றும், அதற்கு அந்த மாணவி தன் அருகில் யாரும் இல்லை என்று கூறியவுடன், திருநாவுக்கரசு சட்டையைக் கழற்றி விட்டு உள்பனியனுடன் கட்டிலில் சாய்ந்த படி செல்ஃபீ எடுத்து அந்த மாணவிக்கு அனுப்பியதுடன், இதேபோல நீயும் போட்டோ எடுத்து அனுப்பு என்று கூறுவது போன்றும் ஸ்கிரீன் ஷாட்டில் பதிவுகள் இடம்பெற்றுள்ளன.

இது குறித்து முன்னாள் மாணவர் அளித்த புகாரின் பேரில் இணைப் பேராசிரியர் திருநாவுக்கரசு பணியிடை நீக்கம் செய்து கல்லூரி நிர்வாகம் உத்தரவிட்டுள்ளது. மேலும் இந்த புகார் குறித்து விசாரணை செய்ய தனிக்குழு அமைக்கப்பட்டுள்ளதாகவும், அந்த விசாரணையின் அடிப்படையில் அடுத்த கட்ட நடவடிக்கை எடுக்கப்படும் எனவும் கல்லூரி நிர்வாகம் தெரிவித்துள்ளது. இதனிடையே திருநாவுக்கரசு மீது நடவடிக்கை எடுக்க கோரி, முன்னாள் மாணவர்கள் போராட்டங்களில் ஈடுபட்டு வருகின்றனர்.