சென்னையில் வாக்குப்பதிவு நடைபெறும் 1121 இடங்கள் நேரலையில் கண்காணிப்பு

நகர்ப்புற உள்ளாட்சி தேர்தல் வாக்குப்பதிவு நாளை  நடைபெற உள்ள நிலையில் கண்காணிப்பு பணிகளை மேலும் தீவிரப்படுத்த, சென்னையில் கூடுதலாக 45 பறக்கும் படைகள் அமைக்கப்பட்டுள்ளது. சென்னை ரிப்பன் மாளிகையில், மாவட்ட தேர்தல் அலுவலர் ககன்தீப் சிங் பேடி,  கூடுதலாக அமைக்கப்பட்டுள்ள பறக்கும்படை வாகனங்களை துவக்கி வைத்தார். இந்நிகழ்வில் மாவட்ட ஆட்சியர் விஜயராணி, மாநகராட்சி துணை ஆணையர்கள் மற்றும் அதிகாரிகள் உடனிருந்தனர்.

பறக்கும் படை வாகனங்களை தொடங்கி வைத்த பின்னர் செய்தியாளர்களை சந்தித்த மாவட்ட தேர்தல் அலுவலர் ககன் தீப் சிங் பேடி  கூறியதாவது:   தேர்தல் தொடர்பான விதிமீறல்களுக்கு இலவச தொலைபேசி எண் 1800 425 7012 அழைத்தால் பறக்கும் படை குழுக்களும் தகவல் தெரிவிக்கப்பட்டு நடவடிக்கை மேற்கொள்ளப்படும். தேர்தல் நடத்தை விதிமுறைகள் தொடர்பாக 69 வழக்கு பதிவு செய்யப்பட்டுள்ளன. தேர்தல் நேரத்தில் பல்வேறு வேட்பாளர்கள் போஸ்டர்கள் ஒட்டி வருகின்றனர் இதனை அனுமதிக்க முடியாது. 21000 க்கும் மேற்பட்ட போஸ்டர்கள் இதுவரை அகற்றப்பட்டுள்ளன.மீறி போஸ்டர் ஒட்டுபவர்கள் மீது நடவடிக்கை எடுக்க உத்தரவிடப்பட்டுள்ளது.

போஸ்டர் மற்றும் ஸ்டிக்கர் ஓட்டும் வேட்பாளர்களுக்கு அபராதம் விதிக்கப்பட்டு அதிகபட்சமாக 5 ஆயிரம் ரூபாய் வேட்பாளர் தேர்தல் செலவில் சேர்க்கப்படும். இரவு அதிகாலை என இரண்டு நேரங்களில் அதிக பணம் பட்டுவாடா மற்றும் பொருட்கள் கொடுப்பதற்கான சாத்தியங்கள் உள்ளன.  எனவே பறக்கும் படையினருக்கு அதிகாலை,இரவு நேரங்களிலும் தீவிரமாக கண்காணிக்க உத்தரவிடப்பட்டுள்ளது. சென்னையில் 1121 இடங்களில் நேரடியாக Live streaming மூலம் கண்காணிக்க உள்ளோம். வாக்குப்பதிவு மின்னணு இயந்திரங்கள் பழுதுபட்டால் அதை,  சரி செய்ய 27 பொறியாளர்கள் தயார் நிலையில் உள்ளனர் என்றார்.