வேட்டவலம் அருகே வீட்டின் கதவை உடைத்து நகை-பணம் திருட்டு

திருவண்ணாமலை மாவட்டம் வேட்டவலத்தை அடுத்த கல்லாய் சொரத்தூர் கூட்ரோட்டில் வசித்து வருபவர் தண்டபாணி (வயது 50), ரியல் எஸ்டேட் தொழில் செய்து வருகிறார். கடந்த 23-ந்தேதி வீட்டை பூட்டி விட்டு குடும்பத்துடன், உறவினரின் துக்க நிகழ்ச்சியில் கலந்து கொள்ள, சென்னைக்கு சென்றுள்ளார்.

தண்டபாணியின் அண்ணன் மனைவி சீதா வீட்டு வாசலில் தண்ணீர் தெளிக்க வந்துள்ளார். அப்போது வீட்டின் கதவு உடைக்கப்பட்டு இருந்ததை கண்டு, அவரது மகன் சூர்யாவுக்கு தகவல் தெரிவித்துள்ளார். உடனே அவர் அங்கு வந்து வீட்டிற்குள் சென்று பார்த்த போது, 2 பீரோக்கள் உடைந்து அதில் இருந்த பொருட்கள் சிதறிக் கிடப்பதையும், பின்புற கதவு திறந்து இருப்பதையும், மேலும் வீடுகள் முழுவதும் மிளகாய் பொடி தூவி இருப்பதையும் கண்டு அதிர்ச்சி அடைந்தார்.

இதுகுறித்து, வேட்டவலம் போலீசாருக்கு தகவல் தெரிவிக்கப்பட்டது. அதன்பேரில் திருவண்ணாமலை மாவட்ட துணை கண்காணிப்பாளர் (பொறுப்பு) ராஜன், வேட்டவலம் சப்-இன்ஸ்பெக்டர் சுமன் மற்றும் தனிப்பிரிவு காவலர் சசிகுமார் ஆகியோர் சம்பவ இடத்துக்கு வந்து விசாரணை நடத்தினர். பின்னர் கைரேகை நிபுணர்கள் தடயங்களை சேகரித்தனர்.

தண்டபாணி வீட்டிற்குள் புகுந்த மர்ம நபர்கள் பீரோவை உடைத்து அதில் இருந்த 7 பவுன் நகைகள் மற்றும் ரூ.20 ஆயிரம் ரொக்கம் ஆகியவற்றை திருடிச் சென்றது தெரியவந்தது. அதன்மதிப்பு ரூ.2½ லட்சம் இருக்கும். இதுகுறித்து தண்டபாணி கொடுத்த புகாரின் பேரில், வேட்டவலம் போலீசார் வழக்குப்பதிவு செய்து, மர்ம நபர்களை வலைவீசி தேடி வருகின்றனர்.