திருவண்ணாமலை: 108 ஆம்புலன்சில் பிறந்த பெண் குழந்தை

தண்டராம்பட்டு தாலுகா நெடுங்காவாடி கிராமத்தை சேர்ந்தவர் சிவா. இவரது மனைவி சத்யா (வயது 23). நிறைமாத கர்ப்பிணியான சத்யா பிரசவத்திற்காக தண்டராம்பட்டு அரசு மருத்துவமனையில் சேர்க்கப்பட்டு இருந்தார். நேற்று மாலை அங்கிருந்து பிரசவத்திற்காக அவர் 108 ஆம்புலன்சு மூலம் திருவண்ணாமலை அரசு மருத்துவமனைக்கு அனுப்பப்பட்டார். ஆம்புலன்சை டிரைவர் குமார் ஓட்டிச்சென்றார். மருத்துவ உதவியாளராக முனியப்பன் இருந்தார்.

ஆம்புலன்சில் செல்லும் போது சத்யா பிரசவ வலியால் துடித்தார். ராதாபுரம் அருகே சென்றபோது சத்யாவிற்கு பிரசவ வலி அதிகரித்தது. இதனால் வேறுவழியின்றி சத்யாவிற்கு மருத்துவ உதவியாளரே பிரசவம் பார்த்தார். அப்போது அவருக்கு அழகான பெண் குழந்தை பிறந்தது. பின்பு தாயும், குழந்தையும் தண்டராம்பட்டு அரசு மருத்துவமனையில் அனுமதிக்கப்பட்டனர்.

குழந்தை எடை குறைவாக இருந்ததால் தாயும், சேயும் மேல்சிகிச்சைக்காக திருவண்ணாமலை அரசு மருத்துவக்கல்லூரி மற்றும் மருத்துவமனையில் சேர்க்கப்பட்டு உள்ளனர்.