சென்னை ராஜமங்கலம் பகுதியில் நாட்டுத் துப்பாக்கி வைத்திருந்த ஐவர் கைது

சென்னை ராஜமங்கலம் காவல் நிலைய எல்லைக்கு உட்பட்ட பகுதியில் ரெட்டேரி நான்கு வழி சாலையில் நள்ளிரவில் ராஜமங்கலம் போலீசார் வாகன சோதனையில் ஈடுபட்டிருந்தனர். அப்போது அவ்வழியாக இருசக்கர வாகனத்தில் வந்த இரண்டு நபர்களின் வாகனத்தை சந்தேகத்தின் அடிப்படையில் போலீசார் வழி மறித்து நிறுத்தி விசாரணை செய்ய முயன்ற போது அதில் வந்தவர்கள் தப்பி ஓட முயன்றனர். போலீசார் அவர்களை துரத்தி சென்றபோது அதில் ஒருவர் பிடிபட்டார். மற்றொருவர் தப்பி சென்றார்.

பின்னர் பிடிபட்ட நபரை ராஜமங்கலம் காவல் நிலையத்தில் அழைத்து சென்று விசாரணை நடத்தினர். முதற்கட்ட விசாரணையில் பிடிபட்ட நபர் புழல் பகுதியைச் சேர்ந்த யோகேஷ், (31) என்பதும் அவர் மதுபாட்டில்களை பதுக்கி வைத்து இருந்ததும் தெரிய வந்தது.

அதன்பேரில், போலீசார் தீவிர விசாரணை நடத்தியதில் அவர் துப்பாக்கியுடன் இருப்பது போன்ற புகைப்படம் அவரது செல்போனில் இருந்தது தெரிய வந்ததன் பேரில், காவல்துறையினர் மேற்கொண்ட தீவிர விசாரணையில், மேற்படி யோகேஷ் மற்றும் அவரது கூட்டாளிகளான கொளத்தூரைச் சேர்ந்த சையது சர்ப்ராஸ் நவாஸ் (41) ஆகிய இருவரும் மாதவரத்தில் தச்சு வேலை செய்து கொண்டிருந்த உத்தரப் பிரதேசம் ஷாஹரண்பூர் பகுதியைச் சேர்ந்த முக்தாதீர் (20) என்பவரின் துணையுடன் இருமுறை உத்தரப்பிரதேசத்திற்கு பயணம் செய்து துப்பாக்கிகளை வாங்கி வந்ததும் விசாரணையில் தெரியவந்தது.

அந்த கள்ள கைத்துப்பாக்கிகளை மேற்படி யோகேஷ் அவரது கூட்டாளியான ரஹமதுல்லா மூலமாக இரும்பு கழிவு வியாபாரியான சையது அபுதாகீருக்கு ஒன்றும், ஏப்ரல் மாதம் 2023-ல் ஆவடி காவல் ஆணையரக எல்லைக்குட்பட்ட பூந்தமல்லி நசரத்பேட்டையில் கொலையுண்ட பிபிஜி சங்கர் என்பவருக்கு சையது அபுதாகீர் மூலமாக ஒன்றும் என விற்றுள்ளார்.

மேலும் இரு கை துப்பாக்கியை விற்பனை செய்தது தெரியவந்தது. தற்போது மேற்படி யோகேஷ் உட்பட, சையது அபுதாகீர், சையது சர்ப்ராஸ் நவாஸ், ரஹமதுல்லா, முக்தாதீர் ஆகிய 5நபர்கள் கைது செய்யப்பட்டதுடன் துப்பாக்கி கைப்பற்றப்பட்டுள்ளது. காவல்துறையினர் தொடர்ந்து விசாரணை மேற்கொண்டு வருகின்றனர்.