பவானிசாகர் அணை நீர்மட்டம் 56 அடியாக உயர்வு

பவானிசாகர் அணையின் நீர்மட்டம் புதன்கிழமை (ஜூன்.5) இன்று காலை 8 மணி நிலவரப்படி 56.03 அடியாக உயர்ந்தது.

ஈரோடு மாவட்ட மக்களின் முக்கிய குடிநீர் ஆதாரமாக விளங்கும் பவானிசாகர் அணை 105 அடி உயரமும், 32.8 டிஎம்சி கொள்ளளவும் கொண்டது. இந்த நிலையில் , அணையின் நீர்த்தேக்க பகுதியான நீலகிரி மலைப்பகுதியில் ஆங்காங்கே பரவலாக மழை பெய்து வருகிறது. இதன் காரணமாக பவானிசாகர் அணைக்கு நீர்வரத்து சற்று அதிகரித்து உள்ளது.

நேற்று (ஜூன்.4) செவ்வாய்க்கிழமை காலை 8 மணி நிலவரப்படி அணைக்கு வினாடிக்கு 986 கன அடி நீர் வந்தது. அப்போது அணையின் நீர்மட்டம் 55.81 அடியாக இருந்தது. அணையில் இருந்து கீழ்பவானி வாய்க்காலில் வினாடிக்கு 5 கன அடி நீரும், ஆற்றில் குடிநீர் தேவைக்காக வினாடிக்கு 200 கன அடி நீரும் திறக்கப்பட்டது.

இந்நிலையில், இன்று (ஜூன்.5) புதன்கிழமை காலை 8 மணி நிலவரப்படி அணைக்கு வரும் நீர்வரத்து வினாடிக்கு 709 கன அடியாக குறைந்தது. அப்போது, அணையின் நீர்மட்டம் 56.03 அடியாக உயர்ந்தது. அணையில் இருந்து வினாடிக்கு 205 கன அடி தண்ணீர் திறக்கப்பட்டது. அணையின் நீர் இருப்பு 6.03 டிஎம்சியாக இருந்தது.