ஈரோடு மாநகராட்சியில் 8 ஓடைகள் தனியார் பங்களிப்புடன் தூர்வாரும் பணிகள் தொடக்கம்

Erode News, Erode News Today- ஈரோடு மாநகராட்சியில் உள்ள 8 ஓடைகள் தனியார் பங்களிப்புடன் தூர்வாரும் பணியினை அமைச்சர் முத்துசாமி இன்று (22ம் தேதி) தொடங்கி வைத்தார்.

ஈரோடு மாநகராட்சி சுண்ணாம்பு ஓடை பகுதியில், ஈரோடு மாநகராட்சி, ஒளிரும் ஈரோடு மற்றும் பொதுமக்கள் இணைந்து மாநகராட்சியில் உள்ள அனைத்து ஓடைகளையும் ஒரே நேரத்தில் தூர்வாரி மாநகராட்சி பகுதிக்குள் மழை காலங்களில் சீராக தண்ணீர் செல்லும் வகையில், புனரமைப்பு பணிகளை வீட்டுவசதி மற்றும் நகர்ப்புற வளர்ச்சித் துறை அமைச்சர் முத்துச்சாமி இன்று (22ம் தேதி) தொடக்கி வைத்தார்.

இந்த நிகழ்ச்சியில், அமைச்சர் முத்துசாமி செய்தியாளர்களிடம் தெரிவித்ததாவது, தமிழ்நாடு முதலமைச்சர் அவர்கள் ஈரோடு மாவட்டத்தில், குறிப்பாக ஈரோடு மாநகராட்சியில், பல்வேறு திட்டப்பணிகளை மேற்கொள்வதற்கான ஆய்வினை செய்து, வழிகாட்டுதல்களை வழங்கியுள்ளார். ஈரோடு மாநகராட்சியின் பரப்பளவு 109.52 ச.கி.மீ. மாநகராட்சி எல்லை இருந்து காவேரி ஆற்றில் கலக்கும் வகையில் மாநகராட்சி பகுதியில் 8 ஓடைகள் உள்ளது.

மழைக்காலத்தினை கருத்தில் கொண்டு தற்போது தொடங்கி வைக்கப்பட்டுள்ள இந்த பணியானது, பிச்சைக்காரன்பள்ளம் ஓடை கருவில் பாறைவலசு முதல் காவேரி வரை, சுண்ணாம்பு ஓடை சித்தோடு 4 ரோடு முதல் காவேரி வரை, ராஜலட்சுமி மில் வழியாக செல்லும் ஓடை சித்தோடு முதல் காவேரி வரை, மோசிசீரனார் வீதி முதல் காவேரி வரை, சடையம்பாளையம் முத்துசாமி காலனி முதல் வெண்டிபாளையம் கோணவாய்க்கால் வரை, ரங்கம்பாளையம் அணை முதல் பெரும்பள்ளம் ஓடை வரை, சூரம்பட்டி அணைக்கட்டு முதல் நஞ்சை ஊத்துக்குளி வரை (குளத்து ஓடை வரை), கொல்லம்பாளையம் பெடிசியா முதல் பாலம் வரை ஏறத்தாழ 29.38 கி.மீ நீளமுள்ள 8 ஓடைகளை தனியார் பங்களிப்புடன் ஒரே கால நேரத்தில் சுத்தம் செய்ய உத்தேசிக்கப்பட்டு, ஈரோடு மாநகராட்சியின் வழிகாட்டுதலில், ஒளிரும் ஈரோடு, தொழில் நிறுவனங்கள் மற்றும் பொதுமக்கள் பங்களிப்புடன் ஓடைகள் தூர்வாரும் பணிகள் மேற்கொள்ளப்படுகிறது.

மேலும், விருப்பமுள்ளவர்கள் ஈரோடு மாநகராட்சி மற்றும் ஒளிரும் ஈரோடு அமைப்புடன் ஒருங்கிணைந்து தூர்வாரும் பணிகளை மேற்கொள்ளலாம். இந்த தூர்வாரும் பணிகள் நிறைவடையும் பொழுது ஓடைகள் அனைத்தும் தூய்மையாக இருக்கும். மேலும் மழை காலங்களில் தண்ணீர் தேங்காமல், வெளியேறுவதற்கும், தூய்மையான தண்ணீர் வருவதற்கும் ஏதுவாக அமையும்.

எனவே, மாநகராட்சி முழுவதும் சுத்தம் செய்கின்ற அளவிற்கு இப்பணிகள் நடைபெறுகிறது. மாநகராட்சி சார்பாக மொத்தமாக இருந்த 947.6 கி.மீ நீளத்தில் உள்ள கால்வாய்கள் ஒழுங்குபடுத்தப்பட்டு ஏறத்தாழ 762 கால்வாய்களுக்கு இருபுறமும் சுவர் அமைத்து, தூய்மைப் படுத்தப்பட்டுள்ளது. மற்ற பணிகளும் தொடர்ந்து நடைபெற்று வருகிறது. எனவே இந்த கழிவுநீர் முழுமையாக வெளியேறுவதற்கான வாய்ப்பு உள்ளது. அந்த ஏற்பாடும் தற்பொழுது மேற்கொள்ளப்பட்டுள்ளது.

பேபி வாய்க்கால் காலிங்கராயன் வாய்க்காலுக்கு பாதுகாப்பாக அமைந்துள்ளது. எனவே பொதுப்பணித்துறை அலுவலர்களுடன் ஆய்வு மேற்கொண்டு, இந்த வாய்க்காலினை சுத்தம் செய்வதற்கான நடவடிக்கை மேற்கொள்ளப்படும். சாயக்கழிவு மற்றும் தோல் கழிவுகளை நேரடியாக திறந்து விடுவதை தவிர்க்க வேண்டும். பொதுமக்களுக்கும், நிலத்தடி தண்ணீருக்கும் பிரச்சனை என்றால் கடுமையாக நடவடிக்கை மேற்கொள்ளப்படும்.

அந்த அடிப்படையில் பல்வேறு நடவடிக்கைகள் மேற்கொள்ளப்பட்டுள்ளது. எனவே எக்காரணம் கொண்டும் சாயக்கழிவு நீரினை சுத்திகரிக்காமல் வெளியேற்றக் கூடாது என்பதை திட்டவட்டமாக தெரிவித்துக் கொள்கிறேன். அவ்வாறு செய்பவர்கள் மீது கடுமையான நடவடிக்கை மேற்கொள்ளப்படும்.

குப்பைகளை நீர்நிலைகளில் கொட்டக்கூடாது. முறையாக குப்பைகளை மாநகராட்சியின் தூய்மை பணியாளர்களிடம் ஒப்படைக்க வேண்டும். எனவே, மாநகராட்சி மட்டுமல்லாது பொதுமக்கள் மற்றும் தொழில் நிறுவனங்களும் ஒருங்கிணைத்து இப்பணிகளை மேற்கொள்ளும்போது மிகச்சிறப்பாக நாம் பாதுகாக்க இயலும் எனத் தெரிவித்தார்.

இந்நிகழ்ச்சியில், ஈரோடு மாநகராட்சி மேயர் சு.நாகரத்தினம், மாநகராட்சி துணை மேயர் வே.செல்வராஜ், ஈரோடு மாநகராட்சி ஆணையாளர் மனிஷ், மாநகராட்சி பொறியாளர் விஜயகுமார், ஒளிரும் ஈரோடு அமைப்பு நிறுவனர் சின்னசாமி உட்பட தொர்புடைய துறை அலுவலர்கள், உள்ளாட்சி அமைப்பு பிரதிநிதிகள் மற்றும் பொதுமக்கள் கலந்து கொண்டனர்.