தாளவாடி அருகே பசுமாட்டை கொன்ற புலியால் அச்சம்

Erode News, Erode Today News, Erode Live Updates - தாளவாடி அருகே பசுமாட்டை புலி கொன்ற சம்பவம் பரபரப்பை ஏற்படுத்தி உள்ளது.

ஈரோடு மாவட்டம் சத்தியமங்கலம் அடுத்த தாளவாடி அருகே உள்ள இரியபுரம் கிராமத்தைச் சேர்ந்தவர் நாகராஜ் (வயது 51). வனப்பகுதியை ஒட்டி அமைந்துள்ள தோட்டத்தில் 5 மாடுகள் வளர்த்து வருகிறார்.

நேற்று முன்தினம் (10ம் தேதி) காலை மாடுகளை தோட்டத்தில் மேய்ச்சலுக்காக கட்டியிருந்தார். மாலையில் மாடுகளை பிடிக்க சென்ற போது ஒரு பசுமாடு காணாமல் போனது.

இந்நிலையில், நேற்று காலை (11ம் தேதி) அப்பகுதியில் உள்ள ஓடையை ஒட்டிய இடத்தில் பசுமாடு இறந்து கிடந்தது. தகவலின்படி, தாளவாடி வனத்துறையினர் ஆய்வு மேற்கொண்டனர்.

அதில், புலியின் கால்தடம் பதிவாகி இருந்தது. வனப்பகுதியில் இருந்து வெளியேறிய புலி பசுமாட்டை கொன்று உடலை ஓடை அருகே இழுத்து போட்டுவிட்டு சென்றது தெரியவந்தது.

இதனால், அப்பகுதி விவசாயிகள் பீதி அடைந்துள்ளனர். மேலும், புலியை கூண்டு வைத்து பிடிக்க கோரிக்கை விடுத்துள்ளனர்.