ஈரோடு மாவட்டத்தில் உள்ள 10 வட்டங்களில் நாளை (13ம் தேதி) ரேஷன் குறைதீர் முகாம்

ஈரோடு மாவட்டத்தில் உள்ள 10 வட்டங்களிலும் பொது விநியோகத் திட்ட சிறப்பு மக்கள் குறைதீர் முகாம் நாளை (13ம் தேதி) சனிக்கிழமை நடைபெற உள்ளது.

இதுகுறித்து ஈரோடு மாவட்ட ஆட்சியர் ராஜ கோபால் சுன்கரா வெளியிட்டுள்ள செய்திக்குறிப்பில் கூறியிருப்பதாவது:-

ஈரோடு மாவட்டத்தில் பொதுவிநியோகத் திட்ட குறைதீர்க்கும் முகாம் நாளை (13ம் தேதி) சனிக்கிழமை மாவட்டத்தில் உள்ள 10 வட்டங்களிலும் நடக்கிறது. இந்த முகாமில் புதிய ரேஷன் கார்டுக்கான மனுக்கள் பெறுதல், ரேஷன் கார்டில் பெயர் சேர்த்தல், நீக்குதல், செல்போன் எண் மாற்றம் போன்ற கோரிக்கைகளை பொதுமக்கள் தெரிவிக்கலாம்.

அதன்படி, ஈரோடு வட்டத்தில் எல்லப்பாளையத்திலும், பெருந்துறை வட்டத்தில் சென்னிமலை எம்.பி.என்.நகரிலும், மொடக்குறிச்சி வட்டத்தில் நகராட்சி நகரிலும், கொடுமுடி வட்டத்தில் தாமரைபாளையத்திலும், கோபிசெட்டிபாளையம் வட்டத்தில் கூகலூரிலும், நம்பியூர் வட்டத்தில் ஒழலக்கோவிலிலும், பவானி வட்டத்தில் பெருந்தலையூரிலும், அந்தியூர் வட்டத்தில் பர்கூர் ஊசிமலையிலும் சத்தியமங்கலம் வட்டத்தில் கொமராபாளையத்திலும், தாளவாடி வட்டத்தில் பழைய ஆசனூரிலும் முகாம் நடக்கிறது.

மேற்கண்ட பகுதிகளில் உள்ள ரேஷன் கடைகளில் நடைபெறும் முகாமினை பொதுமக்கள் பயன்படுத்திக் கொள்ளலாம். இவ்வாறு அதில் கூறப்பட்டுள்ளது.