நீர்பிடிப்பு பகுதிகளில் மழை: பவானிசாகர் அணைக்கு நீர்வரத்து 5,400 கன அடியாக அதிகரிப்பு

பவானிசாகர் அணையின் நீர்ப்பிடிப்பு பகுதியில் பரவலாக மழை பெய்து வருவதால் பவானிசாகர் அணைக்கு நீர்வரத்து 5,400 கன அடியாக அதிகரித்து உள்ளது.

ஈரோடு மாவட்டத்தின் முக்கிய நீராதாரமாக விளங்கும் பவானிசாகர் அணை, 105 அடி உயரமும் 32.8 டி.எம்.சி. கொள்ளளவும் கொண்டது. பவானிசாகர் அணை மூலம் ஈரோடு, திருப்பூர் மற்றும் கரூர் மாவட்டங்களில் உள்ள, 2 லட்சத்து, 47 ஆயிரம் ஏக்கர் நிலங்கள் பாசன வசதி பெறுகின்றன.

கடந்த சில நாட்களாக, பவானிசாகர் அணையின் நீர்பிடிப்பு பகுதிகளில் பருவமழை பெய்து வருவதால், அணைக்கு அவ்வப்போது அணைக்கு நீர்வரத்து குறைந்தும், அதிகரித்தும் என மாறி மாறி வந்து கொண்டுள்ளது. மேலும், கடந்த சில நாட்களாக அணைக்கு நீர் வரத்தை காட்டிலும் பாசனத்திற்காக அதிக அளவில் நீர் திறந்து விடப்பட்டு வருவதால் அணையின் நீர்மட்டம் தொடர்ந்து குறைந்து தற்போது 65 அடிக்கும் கீழே சென்றுவிட்டது.

இந்த நிலையில் கடந்த சில நாட்களாக அணையின் நீர்ப்பிடிப்பு பகுதியில் பரவலாக மழை பெய்து வருகிறது. மேலும் கோவை மாவட்டம் பில்லூர் அணையில் இருந்து நீர்மின் உற்பத்திக்காக தண்ணீர் திறந்து விடப்பட்டது. இதன்காரணமாக அணைக்கு தண்ணீர் வரத்து அதிகரித்துள்ளது.

ஞாயிற்றுக்கிழமை (நவ.05) இன்று காலை 8 மணி நிலவரப்படி அணையின் நீர்மட்ட நிலவரம்:-

நீர் மட்டம் - 65.84 அடி ,

நீர் இருப்பு - 9.29 டிஎம்சி ,

நீர் வரத்து வினாடிக்கு - 5,402 கன அடி ,

நீர் வெளியேற்றம் - 400 கன அடி ,

கீழ்பவானி வாய்க்கால் பாசனத்திற்காக மட்டும் வினாடிக்கு 400 கன அடி நீர் திறக்கப்பட்டுள்ளது. அணைக்கு நீர்வரத்து அதிகரிக்க தொடங்கியதால் விவசாயிகள் மகிழ்ச்சி அடைந்து உள்ளனர். மேலும், பவானிசாகர் அணை பகுதியில் 47.4 மி.மீ மழைப்பொழிவு பதிவாகியுள்ளது.