ஈரோடு கொங்கு கலை அறிவியல் கல்லூரியில் களைகட்டிய பொங்கல் கொண்டாட்டம்

ஈரோடு கொங்கு கலை அறிவியல் கல்லூரியில் மயிலாட்டம், ஒயிலாட்டம் என பல்வேறு கலை நிகழ்ச்சிகளுடன் பொங்கல் விழா விமரிசையாக கொண்டாடப்பட்டது.

ஈரோடு அடுத்த திண்டல் அருகே நஞ்சனாபுரத்தில் உள்ள கொங்கு கலை அறிவியல் கல்லூரி தமிழ்த் துறையின் சார்பாக ஆண்டுதோறும் நடைபெறும் பொங்கல் விழா இந்த ஆண்டு வெள்ளிக்கிழமை (இன்று) நடைபெற்றது. இவ்விழாவிற்குக் கல்லூரியின் தாளாளர் தங்கவேல் தலைமை தாங்கினார். முதல்வர் வாசுதேவன் முன்னிலை வகித்தார். அனைத்துத் துறைகளின் துறைத் தலைவர்கள், பேராசிரியர்கள், ஆசிரியரல்லாப் பணியாளர்கள் இவ்விழாவில் கலந்துகொண்டு உற்சாகத்தோடு பொங்கல் வைத்துக் கொண்டாடினர்.

மேலும், அனைத்துத்துறை மாணவ, மாணவியர்களும் பொங்கல் விழா போட்டியில் பங்கேற்று பாரம்பரிய பொருட்களை காட்சிப்படுத்தியதோடு, பாரம்பரியக் கலைகளை வெளிப்படுத்தும் பொருட்டு மயிலாட்டம், ஒயிலாட்டம், சிலம்பாட்டம், சலங்கையாட்டம், காவடியாட்டம், பொய்க்கால் குதிரையாட்டம் வள்ளிக்கும்மி முதலிய கிராமியக்கலைகளை சிறப்பான முறையில் நிகழ்த்திக் காட்டினர்.

அதைத் தொடர்ந்து, மாணவ மாணவியர்களுக்கு உறி அடிக்கும் போட்டியும் நடைபெற்றது. இவ்விழாவை தமிழ்த்துறைத் தலைவர் தினகரன் மற்றும் துறைப் பேராசிரியர்கள் ஒருங்கிணைந்து போட்டிகளை சிறப்பாக நடத்தினர்.