வரும் ஆகஸ்ட் 2ம் தேதி அமைச்சர் உதயநிதி ஈரோடு வருகை

Erode News, Erode News Today- ஈரோட்டில் வரும் ஆகஸ்ட் 2ம் தேதி பல்வேறு நிகழ்ச்சிகளில் பங்கேற்பதற்காக அமைச்சர் உதயநிதி வருகிறார்.

தமிழக இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் வருகிற ஆகஸ்ட் மாதம் 1ம் தேதி ஈரோட்டில் பல்வேறு நிகழ்ச்சிகளில் கலந்து கொள்வதற்காக திருச்சியில் இருந்து ஈரோடு வருகிறார். அன்று இரவு 8 மணியளவில் ஈரோடு சுற்றுலா மாளிகையில் ஓய்வெடுக்கிறார்.

மறுநாள் ஆகஸ்ட் 2ம் தேதி காலை 10 மணியளவில் ஈரோட்டில் ரூ.7.57 கோடியில் மேம்படுத்தப்பட்ட வ.உ.சி. மைதானத்தை திறந்து வைக்கிறார். தொடர்ந்து, காலை 10.45 மணியளவில் ஈரோடு மாவட்ட ஆட்சியர் அலுவலக புதிய கட்டிட கூட்டரங்கில் நான் முதல்வன் மற்றும் புதுமைப் பெண் திட்ட பயனாளிகளுடன் கலந்துரையாடுகிறார்.

இதையடுத்து, காலை 11.30 மணியளவில் வில்லரசம்பட்டியில் உள்ள மண்டபத்தில் கலைஞர் விளையாட்டு உபகரணங்கள் மற்றும் நலத்திட்ட உதவிகளை வழங்குகிறார். பின்னர், மதியம் 1 மணியளவில் ஆட்சியர் அலுவலக புதிய கட்டிடத்தில் மகளிர் சுய உதவிக் குழுவினருடன் கலந்துரையாடி கோரிக்கைகளை கேட்டறிய உள்ளார்.

அதனைத் தொடர்ந்து, மாலை 4.30 மணியளவில் ஆட்சியர் அலுவலக பழைய கட்டிடத்தில் அனைத்து துறை அலுவலர்களுடன் ஆய்வு கூட்டம் நடத்தி, வளர்ச்சி திட்டப் பணிகள் முன்னேற்றம் குறித்து கேட்டறிகிறார். மாலை 7 மணியளவில் ஈரோட்டில் இருந்து கோவைக்கு புறப்பட்டு செல்கிறார்.