ஈரோடு திண்டல் முருகன் கோயிலில் சிவன் சன்னதி, அம்மன் சன்னதி கட்ட கால்கோள் விழா

Erode News, Erode News Today- ஈரோடு திண்டல் வேலாயுதசுவாமி கோயிலில் சிவன் சன்னதி, அம்மன் சன்னதி கட்டுவதற்கான கால்கோள் விழா வெகு விமர்சையாக இன்று (22ம் தேதி) நடந்தது.

இந்து சமய அறநிலையத்துறை கட்டுப்பாட்டில் உள்ள, ஈரோடு திண்டல் வேலாயுதசுவாமி கோயிலில் முருகன் குமார வடிவம் தாங்கி பக்தர்களுக்கு காட்சி அளித்து வருகிறார். இந்தக் கோவிலில் ஆண்டுதோறும் கந்த சஷ்டி விழா சிறப்பாக கொண்டாடப்பட்டு வருகிறது.

இந்நிலையில், இக்கோவிலில், ரூ.3 கோடி மதிப்பில் ராஜகோபுரம் அமைக்கும் பணியும், ரூ.2 கோடி மதிப்பில், புதியதாக சிவன் சன்னதி, அம்மன் சன்னதி மற்றும் பரிவார சன்னதிகள் கட்ட முடிவு செய்யப்பட்டது. இதில், ஏற்கனவே ராஜகோபுரம் அமைக்கும் பணி தொடங்கி நடந்து வருகிறது.

இந்நிலையில், சிவன் சன்னதி, அம்மன் சன்னதி மற்றும் பரிவார சன்னதிகள் கட்டுவதற்கான கால்கோள் விழா மற்றும் ராஜகோபுரத்திற்கு நிலைக்கால் வைக்கும் விழா வீட்டுவசதி மற்றும் நகர்ப்புற வளர்ச்சித் துறை அமைச்சர் சு.முத்துசாமி தலைமையில் இன்று (22ம் தேதி) நடந்தது.

இதில், ஈரோடு நாடாளுமன்ற உறுப்பினர் கே.இ.பிரகாஷ், கோயில் செயல் அலுவலர் சுகுமார், மாவட்ட அறங்காவலர் குழுத்தலைவர் எல்லாப்பாளையம் சிவகுமார், வேலாயுதசுவாமி கோயில் அறங்காவலர் குழுத்தலைவர் வேலுச்சாமி உள்ளிட்ட பலர் பங்கேற்றனர்.