சத்தியமங்கலம் அருகே சாலையோர பள்ளத்தில் அரசு பேருந்து கவிழ்ந்து 8 பேர் காயம்

Erode News, Erode News Today- சத்தியமங்கலம் அருகே சாலையோர பள்ளத்தில் அரசு பேருந்து கவிழ்ந்து விபத்துக்குள்ளானதில் 8 பேர் காயம் அடைந்தனர்.

ஈரோடு மாவட்டம் சத்தியமங்கலத்தில் இருந்து கடம்பூர் வழியாக கேர்மாளம் சோதனைச்சாவடிக்கு 30க்கும் மேற்பட்ட பயணிகளுடன் அரசு பேருந்து ஒன்று நேற்று (29ம் தேதி) மதியம் சென்று கொண்டிருந்தது. இந்த பேருந்தை ஞானசுந்தரம் என்பவர் ஓட்டினார். நடத்துநராக மயில்சாமி என்பவர் இருந்தார்.

இந்த நிலையில், பேருந்து கேர்மாளம் அருகே பூதாளபுரம் விஎம் தொட்டி என்ற இடத்தில் சென்றபோது, எதிரே வந்த சரக்கு வாகனத்துக்கு வழிவிட சாலையோர ஒதுங்கிய போது, எதிர்பாராத விதமாக சாலையோர பள்ளத்தில் பேருந்து சாய்த்தது. இதில், பயணிகள் எட்டு பேர் காயமடைந்தனர்.

இதனையடுத்து, அந்த வழியாக சென்றவர்கள் காயம் அடைந்தவர்களை மீட்டு ஆம்புலன்ஸ் மூலம் கேர்மாளம் அரசு துணை சுகாதார நிலையத்துக்கு அனுப்பி வைத்தனர். அவர்கள் அங்கு சிகிச்சை பெற்று வீடு திரும்பினர். மேலும், விபத்தில் கவிழ்ந்த பேருந்தை ஆசனூர் போலீசார் கிரேன் மூலம் மீட்டு, இதுகுறித்து விசாரிக்கின்றனர்.