பவானிசாகர் அணை நீர்மட்டம் 44.41 அடியாக சரிவு

பவானிசாகர் அணையின் நீர்மட்டம் திங்கட்கிழமை (மே.13) இன்று காலை 8 மணி நிலவரப்படி 44.41 அடியாக சரிந்துள்ளது.

தமிழ்நாட்டில் மேட்டூர் அணைக்கு அடுத்தபடியாக இரண்டாவது பெரிய அணையாக விளங்கும் பவானிசாகர் அணை 105 அடி உயரமும், 32.8 டிஎம்சி கொள்ளளவும் கொண்டதாகும். இந்நிலையில், அணையின் நீர்ப்பிடிப்பு பகுதிகளில் கடந்த சில மாதங்களாகவே மழைப்பொழிவு இல்லாததால் அணைக்கு நீர்வரத்து குறைந்து வருகிறது.

அதேநேரம் அணைக்கு வரும் நீர் வரத்தை விட நீர் திறப்பு அதிகமாக இருப்பதால் அணையின் நீர்மட்டமும் தொடர்ந்து குறைந்து வருகிறது. இன்று காலை 8 மணி நிலவரப்படி அணையின் நீர்மட்டம் 44.41 அடியாக குறைந்துள்ளது. இதனால் பவானிசாகர் அணையின் நீர்த்தேக்க பகுதி சேரும், சகதியுமாக காட்சியளிக்கிறது. மேலும் கடல் போல் பிரம்மாண்டமாக காட்சியளித்த பவானிசாகர் அணை தற்போது குளமும், குட்டையுமாக காட்சியளிக்கிறது.

அணைக்கு வினாடிக்கு 24 கன அடி வீதம் தண்ணீர் வந்து கொண்டிருக்கிறது. கீழ்பவானி வாய்க்காலில் பாசனத்திற்கு 5 கன அடி நீரும், பவானி ஆற்றில் குடிநீர் தேவைக்காக 200 கன அடி நீரும் என மொத்தம் 205 கன அடி நீர் திறக்கப்பட்டு வருகிறது. அணையின் நீர் இருப்பு 3.22 டிஎம்சியாக உள்ளது.