அந்தியூர் குருநாதசுவாமி கோயில் கால்நடைச் சந்தை சிறப்பு புகைப்படத் தொகுப்பு

அந்தியூர் குருநாதசுவாமி கோயில் ஆடித்தேர் திருவிழாவையொட்டி புகழ்பெற்ற கால்நடைச் சந்தை தொடங்கியது. தொடர்ந்து, வரும் 10ம் தேதி வரை நடக்கிறது.

ஈரோடு மாவட்டம் அந்தியூர் புதுப்பாளையத்தில் அமைந்துள்ள பிரசித்தி பெற்ற குருநாதசுவாமி கோயிலில் ஆண்டுதோறும் ஆடிப்பெருந் தேர்த்திருவிழா வெகு விமரிசையாக நடைபெறும். இந்த திருவிழாவின் சிறப்பு என்னவென்றால் தென்னிந்திய அளவில் புகழ் பெற்ற கால்நடைச் சந்தை நடைபெறுவது தான்.

இந்நிலையில், நடப்பாண்டு ஆடிப்பெருந் தேர்த்திருவிழா, புகழ்பெற்ற கால்நடைச் சந்தை இன்று (7ம் தேதி) தொடங்கி நடைபெற்று வருகிறது. தொடர்ந்து, வரும் 10ம் தேதி வரை 4 நாட்கள் நடைபெறுகிறது.

இன்று தொடங்கிய கால்நடைச் சந்தைக்கு சேலம், நாமக்கல் உள்பட தமிழகத்தின் பல்வேறு மாவட்டங்கள் மட்டுமின்றி, வெளி மாநிலங்களில் இருந்தும் வியாபாரிகள் குதிரைகள், மாடுகளை மற்றும் ஆடுகளை விற்பனைக்காகவும், கண்காட்சிக்காகவும் கொண்டு வந்துள்ளனர்.

மேலும், கால்நடைகளுக்கென பிரத்யேகமாக தயார் செய்யப்பட்ட அலங்காரப் பொருட்களும் விற்பனைக்காக கொண்டு வரப்பட்டுள்ளன. குதிரைகளையும், மாடுகளையும் வாங்கிச் செல்வதற்கும் தமிழகம் மற்றும் தென்னிந்தியாவின் பல்வேறு மாநிலங்களில் இருந்தும் வியாபாரிகள் வருகை தந்த வண்ணம் உள்ளனர்.

குருநாதசுவாமி கோயில் கால்நடைச் சந்தை தொடங்கிய நிலையில், சிறப்பு புகைப்படத் தொகுப்பினை இங்கு காண்போம்.