ஈரோட்டில் ஓட்டலில் தீ விபத்து
Erode News- ஓட்டலில் தீ விபத்து ஏற்பட்டதை படத்தில் காணலாம்.
Erode Today News, Erode News - ஈரோடு கருங்கல்பாளையத்தில் உள்ள ஓட்டலில் தீ விபத்து ஏற்பட்டது.
ஈரோடு கருங்கல்பாளையம் கிருஷ்ணம்பாளையம் சாலையில் 2 மாடி கட்டிடத்தில் தரைதளத்திலும், முதல் மாடியிலும் ஓட்டல் ஒன்று செயல்பட்டு வருகிறது. நேற்று இரவு சுமார் 10க்கும் மேற்பட்டோர் ஓட்டலில் அமர்ந்து சாப்பிட்டு கொண்டு இருந்தனர். பார்சல் வாங்குவதற்கும் ஒரு சிலர் நின்றிருந்தனர்.
இந்த நிலையில், ஓட்டலின் முன்பகுதியில் வைக்கப்பட்டிருந்த உயரமான விளம்பர பலகையில் மின்கசிவு ஏற்பட்டதால் திடீரென தீப்பொறி ஏற்பட்டது. இதனால் விளம்பர பலகை தீப்பற்றி எரிய தொடங்கி, தீ மளமளவென பரவி கொழுந்துவிட்டு எரிந்தது.
இதைக் கண்ட ஓட்டல் ஊழியர்களும், வாடிக்கையாளர்களும் அலறி அடித்துக்கொண்டு வெளியேறினர். இதுகுறித்த தகவல் கிடைத்ததும் ஈரோடு தீயணைப்பு படை வீரர்கள் சம்பவ இடத்துக்கு விரைந்து சென்றனர்.
உடனே தீயணைப்பு படை வீரர்கள் தண்ணீரை பீய்ச்சி அடித்து தீயை கட்டுக்குள் கொண்டு வந்தனர். இந்த தீ விபத்தில் வாடிக்கையாளர்களும், ஊழியர்களும் காயமின்றி உயிர் தப்பினர்.
