சத்தியமங்கலம் அருகே இருசக்கர வாகனத்தில் மான் கறி கொண்டு வந்தவர் கைது

சத்தியமங்கலம் அருகே இருசக்கர வாகனத்தில் மான் கறி கொண்டு வந்தவர் கைது செய்யப்பட்டார்.

ஈரோடு மாவட்டம் சத்தியமங்கலம் - மேட்டுப்பாளையம் சாலையில் உள்ள காந்தி நகர் பகுதியில், போக்குவரத்து போலீசார் நேற்று (26ம் தேதி) வாகன சோதனையில் ஈடுபட்டனர். அப்போது, அந்த வழியாக இருசக்கர வாகனத்தில் வந்த ஒருவரை போலீசார் நிறுத்தி விசாரித்தனர்.

பின்னர், அவர் வைத்திருந்த பையை வாங்கி சோதனை செய்தனர். அதில், மான் கறி இருந்தது தெரியவந்தது. இதைத் தொடர்ந்து, போலீசார் அவரிடம் நடத்திய விசாரணையில் அவர் ஆசனூர் கெத்தேசாலை சேர்ந்த பொம்மன் (வயது 29) என்பது தெரியவந்தது.

மேலும், ஊட்டி எஸ்டேட்டில் தங்கி வேலை செய்து வந்த பொம்மன், புலி வேட்டையாடிச் சென்ற கடமானின் இறைச்சியை எடுத்து காய வைத்து, சொந்த ஊருக்கு கொண்டு வந்ததும் விசாரணையில் தெரிய வந்தது.

இதையடுத்து, பொம்மனை போலீசார் சத்தியமங்கலம் வனத்துறையினரிடம் ஒப்படைத்தனர். பின்னர், இதுதொடர்பாக வனத்துறையினர் பொம்மனை கைது செய்து, அவரிடம் இருந்த ஒன்றரை கிலோ கடமான் கறியை பறிமுதல் செய்தனர்.