கோவை மக்களவை தொகுதியில் போட்டி?: கமல் சூசகம்
மக்கள் நீதி மய்யம் நிறுவனர் கமல்ஹாசன், கோவை நாடாளுமன்றத் தொகுதியில் மக்களவைத் தேர்தலில் போட்டியிட வாய்ப்பு இருப்பதாக சூசகமாக தெரிவித்துள்ளார். வெள்ளிக்கிழமை கட்சி நிர்வாகிகளுடன் கூட்டத்திற்கு தலைமை தாங்குவதற்காக கோவை வந்திருந்த கமல், 2024ல் கோவையில் தேர்தல் களத்தில் ஈடுபடுவதற்கான வாய்ப்பை நிராகரிக்கவில்லை.
மக்களவைத் தேர்தல், கூட்டணி தொடர்பாக மக்கள் நீதி மய்யம் கட்சி தலைவர் கமல்ஹாசன், கோவையில் கட்சி நிர்வாகிகளுடன் ஆலோசனையில் ஈடுபட்டார். அப்போது கமல்ஹாசன் பேசுகையில், ‛2024ஐ நோக்கி நகர்ந்து வருகிறோம். அது மட்டும் தானா என்றால் இல்லை, 2026 அதைவிட முக்கியம். மக்களை மையம் கொள்வதே மய்யத்தின் வேலை. மக்கள் நீதி மய்யம் யாருடைய பி டீம் என்றால், மக்களின் பி டீம். தேர்தல் கூட்டணி பற்றி பேச இன்னும் நேரம் உள்ளது. ஜனநாயகத்திற்கு ஆபத்து வந்துள்ளது. இந்திய இறையாண்மையை காத்து தேசத்தை மறுபடியும் நல்ல பாதைக்கு கொண்டு செல்ல வேண்டும்' எனப் பேசினார்.
கோவையில் போட்டியிடுவீர்களா என்று செய்தியாளர்கள் கேட்டதற்கு, நல்ல யோசனைதான் என்றார். 2021ல் கோவை தெற்கு சட்டமன்றத் தொகுதியில் போட்டியிட்ட கமல், பாஜகவின் வானதி சீனிவாசனிடம் குறைந்த வாக்கு வித்தியாசத்தில் தோல்வியடைந்தார். கோயம்புத்தூர் மாவட்டத்தில் உள்ள மற்ற சட்டமன்ற தொகுதிகளில் கூட, ம.நீ.ம கணிசமான வாக்குகளைப் பெற்றது.
கூட்டணி குறித்த கேள்விக்கு கமல், மற்ற கட்சிகளுடன் கூட்டணி வைப்பதா அல்லது தனித்து தேர்தலை சந்திப்பதா என்பது குறித்து கட்சி இன்னும் முடிவு செய்யவில்லை என்றார். “இது போன்ற விஷயங்களை முடிவு செய்வதற்காகவே இந்தக் கூட்டம். விரைவில் அழைப்பை எடுப்போம். முடிவுகள் பின்னர் அறிவிக்கப்படும்,'' என்றார்.
கர்நாடக சட்டசபை தேர்தலில் காங்கிரசுக்கு ஆதரவு அளிக்குமாறு ராகுல் காந்தி வேண்டுகோள் விடுத்ததாக கமல் தெரிவித்துள்ளார். எனவே, கர்நாடகாவில் காங்கிரசுக்கு எனது ஆதரவை அளித்துள்ளேன் என கூறினார்
பின்னர் அவர் வெளியிட்ட அறிக்கையில், வெள்ளிக்கிழமை காலை தனது ஆதரவைக் கோரி ராகுல் தன்னுடன் தொலைபேசியில் பேசியதாகக் கூறினார். கர்நாடக காங்கிரஸ் தலைவர் டி.கே. சிவக்குமார், அங்கு கட்சிக்காக பிரசாரம் செய்யுமாறு அவருக்கு கடிதம் எழுதியுள்ளார், மேலும் இது குறித்து ஒரு நாளில் அவர் முடிவு செய்வார். அரசியல் சாசனத்திற்கு அச்சுறுத்தல் ஏற்படும் போது, கட்சி பேதங்களை மறந்து, ஒன்றிணைந்து செயல்பட வேண்டும் என கமல் கூறியுள்ளார்.
