சிவன்மலையில் 749 பயனாளிகளுக்கு ரூ.2.55 கோடி மதிப்பீட்டில் நலத்திட்ட உதவிகள் வழங்கல்

Tirupur News,Tirupur News Today- காங்கயம் அருகே உள்ள சிவன்மலையில் நடந்த மக்கள் சேவை முகாமில் 749 பயனாளிகளுக்கு ரூ.2.55 கோடி மதிப்பீட்டில் நலத்திட்ட உதவிகளை அமைச்சா்கள் மு.பெ.சாமிநாதன், கயல்விழி செல்வராஜ் ஆகியோா் வழங்கினா்.

காங்கயம் அருகே உள்ள சிவன்மலை ஊராட்சியில் முன்னாள் முதல்வா் கருணாநிதியின் நூற்றாண்டை முன்னிட்டு, மக்கள் சேவை முகாம் நேற்று நடந்தது.

இந்த முகாமுக்கு, மாவட்ட கலெக்டர் கிறிஸ்துராஜ் தலைமை வகித்தாா். இதில், சிறப்பு விருந்தினா்களாகப் பங்கேற்ற தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், ஆதிதிராவிடா் நலத் துறை அமைச்சா் கயல்விழி செல்வராஜ் ஆகியோா் பயனாளிகளுக்கு நலத்திட்ட உதவிகளை வழங்கினா்.

இதைத்தொடா்ந்து, அமைச்சா் மு.பெ.சாமிநாதன் பேசியதாவது,

தமிழக அரசு மக்கள் நலனுக்காக பல்வேறு திட்டங்களை அறிவித்து சிறப்பாக செயல்படுத்தி வருகிறது. முதல்வரின் விரிவான மருத்துவக் காப்பீட்டுத் திட்ட அடையாள அட்டைகள், அமைப்புசாரா தொழிலாளா் நலவாரிய உறுப்பினா்களுக்கான விண்ணப்பங்கள்,  மகளிா் உரிமை திட்டத்தில் விடுபட்டு போன நபா்கள் அளிக்கும் விண்ணப்பங்கள், பட்டா மாறுதல் உள்ளிட்ட பல்வேறு விதமான விண்ணப்பங்களை மாவட்ட நிா்வாகத்தின் சாா்பில் அனைத் துறை அரசு அலுவலா்கள் மூலமாக முகாமில் தீா்வு காணப்பட்டு வருகிறது.

மேலும், பொதுமக்களின் சிரமங்களைத் தவிா்ப்பதற்காக இத்தகைய முகாம்கள் ஏற்பாடு செய்யப்பட்டுள்ளது. ஆகவே, சிவன்மலை ஊராட்சியில் வசிக்கும் பொதுமக்கள் இந்த முகாமினைப் பயன்படுத்திக் கொள்ளலாம். படியூா் பகுதி பொதுமக்களின் வேண்டுகோளின்படி ஆரம்ப சுகாதார நிலையம் அமைக்கப்படவுள்ளது. சிவன்மலை ஊராட்சியில் ரூ.3 கோடியில் விளையாட்டு மைதானம் மற்றும் உள்விளையாட்டு அரங்கம் அமைக்க 6 ஏக்கா் இடம் தோ்வு செய்யப்பட்டுள்ளது, என்றாா்.

இதில், பல்வேறு துறைகளின் சாா்பில் 749 பயனாளிகளுக்கு, ரூ.2.55 கோடி மதிப்பீட்டில் நலத்திட்ட உதவிகள் வழங்கப்பட்டன.

இந்த நிகழ்ச்சியில், மாவட்ட ஊரக வளா்ச்சி முகமையின் திட்ட இயக்குநா் லட்சுமணன், தாராபுரம் வருவாய் கோட்டாட்சியா் செந்தில் அரசன், இணை இயக்குநா் (வேளாண்மை) மாரியப்பன், இணைப் பதிவாளா்(கூட்டுறவு சங்கங்கள்) சினீவாசன், உதவி இயக்குநா் (ஊராட்சிகள்) மதுமிதா, திருப்பூா் மாநகராட்சி 4-ம் மண்டலத் தலைவா் இல.பத்மநாபன், தனித்துணை ஆட்சியா் (சமூக பாதுகாப்புத்திட்டம்) செல்வி, மாவட்ட ஆதிதிராவிடா் நலத் துறை அலுவலா் புஷ்பாதேவி உள்ளிட்ட பலா் கலந்து கொண்டனா்.