ஓ.என்.ஜி.சி. ரசாயன கழிவுநீர் விவசாய நிலத்தில் பரவியதால் பாதிப்பு

விவசாய தொழிலை உயிர் மூச்சாக கொண்டு உள்ள திருவாரூர் மாவட்டத்தில் உள்ள பல ஆயிரம் ஏக்கர் விளைநிலங்களில் ஓ.என்.ஜி.சி. நிர்வாகத்தின் மூலம் 70க்கும் மேற்பட்ட இடங்களில் கச்சா எண்ணெய் எடுக்கப்பட்டுவருவதால் விவசாயிகள் பல்வேறு நெருக்கடிகளை சந்தித்து வருவதோடு விவசாயத்தை விட்டு வெளியேறும் சூழ்நிலைக்கு ஆளாகியுள்ளனர். அந்த வகையில் இம்மாவட்டத்தில் பாரதிமூலங்குடி,வெள்ளக்குடி, அடியக்கமங்கலம், கருப்பூர் உள்ளிட்ட பல பகுதிகளில் கச்சா எண்ணெய் கொண்டுசெல்லும் குழாயில் கடந்த சில மாதங்களுக்கு முன்பு உடைப்பு ஏற்பட்டு விளைநிலங்களில் கச்சா எண்ணெய் பரவி விவசாயம் செய்ய முடியாத நிலை ஏற்பட்டது.

இந்நிலையில் நேற்று கோட்டூர் ஒன்றியத்திற்கு உட்பட்ட மேலபனையூர் ஊராட்சி கமலாபுரம் கிராமத்தில் ஓ.என்.ஜி.சி. நிர்வாகம் கச்சா எண்ணெய் எடுத்துவரும் பகுதியில் இரசாயன கழிவுகளை சேமித்து வைத்துள்ளனர். இத்தகைய சூழலில் கடந்த சில தினங்களுக்கு பெய்த மழையின் காரணமாக இரசாயன கழிவுகள் சேமித்துவைத்துள்ள குட்டை போன்ற பகுதி நிரம்பி அக்கழிவுகள் அருகில் இருந்த விவசாய கூலி தொழிலாளியான சுமித்ரா சேகர் எனபவருக்கு சொந்தமான 3 ஏக்கர் விளைநிலத்தில் பரவியது. இதனால் நிலத்தின் மண்வளம் பாதிக்கப்பட்டுள்ளது.

மேலும் இந்த கழிவுநீரை அகற்றினாலும் வரும் 10 ஆண்டுகளுக்கு சாகுபடி செய்யமுடியாத நிலை ஏற்பட்டுள்ளதாக விவசாயிகள் மனவேதனை தெரிவித்தனர். ஆகையால் மத்திய, மாநில அரசுகள் இதுகுறித்து உரிய விசாரணை மேற்கொண்டு விவசாயம் செய்யமுடியாத நிலையினை கருத்தில்கொண்டு உரிய இழப்பீடு வழங்குவதோடு, ஓ.என்.ஜி.சி. இரசாயன கழிவு பரவிய நிலத்தில் உள்ள மண்ணை முற்றாக மாற்றி தரவும் கோரிக்கை விடுத்துள்ளனர்.

மேலும் இத்தகைய கழிவுநீரால் நிலத்தடி நீர் மட்டம் மாசு ஏற்பட்டு வருவதோடு, இப்பகுதி மக்கள் நிலத்தடி நீரை ஆதாரமாக கொண்டு பயன்படுத்திவருவதால் தோல்வியாதி, மூச்சுதிணறல் முதலான சுவாச கோளாறுகள் ஏற்படும் அபாயமும் எழுந்துள்ளது. குறிப்பாக குழந்தைகளுக்கு கண்களில் பலவித நோய்கள் தாக்கும் அபாயமும் எழுந்துள்ளதாக கிராம மக்கள் விவசாயிகள் ஒ.என்.ஜி.சி. அதிகாரிகளுடன் வாக்குவாதத்தில் ஈடுபட்டனர்.இதனால் அப்பகுதியில் பரபரப்பு ஏற்பட்டது.

ஓ.என்.ஜி.சி. நிர்வாகத்தின் இத்தகைய மக்கள் விரோத போக்கை கண்டித்தும், பாதிப்புக்கு உள்ளான பகுதிகளில் வாழும் பொதுமக்களின் நலன்காக்க வலியுறுத்தியும் ஓ.என்.ஜி.சி. கச்சா எண்ணெய் எடுக்கும் பகுதியினை மூட வலியுறுத்தி முற்றுகை மற்றும் சாலை மறியல் போராட்டத்தில் ஈடுபட உள்ளதாகவும் கிராம மக்கள் எச்சரித்தனர்.