தேனி புதுப்பள்ளிவாசல் ஜமாத் நிர்வாகம் சார்பில் கொரோனா தடுப்பூசி முகாம்

தேனி மாவட்ட சுகாதாரத்துறையும், தேனி புதுப்பள்ளிவாசல் ஜமாத் நிர்வாகமும், சமூக நல்லிணக்க பேரவையும் இணைந்து இன்று புதுப்பள்ளிவாசலில் கொரோனா தடுப்பூசி முகாம் நடத்தினர்.

காலை ஒன்பது மணிக்கு தொடங்கிய முகாம் மாலை ஐந்து மணி வரை நடந்தது. இந்து மக்கள், இஸ்லாமிய மக்கள், கிறிஸ்தவ மக்கள் என அனைத்து தரப்பினரும் ஜாதி, மத, பாகுபாடு இன்றி வந்து கொரோனா தடுப்பூசி போட்டுக் கொண்டனர். ஊசி போட வந்த அத்தனை பேரையும் ஜமாத் நிர்வாகிகள் அழைத்து சென்று ஊசி போட வைத்து அங்கேயே சிறிது நேரம் அமர வைத்து,  அவர்களுக்கு தேவையான சிறு, சிறு உதவிகள் செய்தும், தேவையானவற்றை கொடுத்தும் உபசரித்தனர். தடுப்பூசி விதிப்படி ஊசி போட்ட பின்னர் குறைந்தபட்சம் அரைமணி நேரம் அங்கேயே அமர்ந்த பின்னர் தான் வெளியேற வேண்டும். இந்த விதிகளின் படி ஜமாத் நிர்வாகிகள் தடுப்பூசி போட்டுக்கொண்டவர்களை அமர வைத்து அனுப்பி வைத்தனர்.

ஜமாத் நிர்வாகம் சார்பில் சம்சுதீன், சேட், ச அன்சாரி, இந்தியன் ரெட்கிராஸ் சொசைட்டி சார்பில் முன்னாள் செயலாளர் முகமது பாட்ஷா, உறுப்பினர் அபுதாகீர் ராஜா, சமூக நல்லிணக்க பேரவை தலைவர் முகமதுசபி உட்பட பல முக்கிய பிரமுகர்கள் காலை முதல் மாலை வரை இருந்த இந்த ஏற்பாடுகளை கவனித்தனர். தேனி புதுப்பள்ளிவாசல் ஜமாத் செய்தது போல இதர முக்கிய அமைப்புகளின் நிர்வாகிகளும் இந்த தடுப்பூசி பணிக்கு ஒத்துழைப்பு வழங்க வேண்டும் என தேனி மாவட்ட சுகாதாரத்துறை வேண்டுகோள் விடுத்துள்ளது.