சேலத்தில் திமுக கூட்டணி கட்சி வேட்பாளர்களை ஆதரித்து காங்கிரஸ் கட்சியின் முன்னாள் தலைவர் ராகுல் காந்தி மற்றும் திமுக தலைவர் ஸ்டாலின் பங்கேற்கும் மாபெரும் பொதுக்கூட்டத்திற்கான பந்தல் அமைக்கும் பணி தீவிரமாக நடைபெற்று வருகிறது.
தமிழகத்தில் சட்டமன்ற தேர்தல் தேதி அறிவிக்கப்பட்ட நாள் முதல் அரசியல் கட்சிகள் தீவிர அனல் பறக்கும் பிரச்சாரத்தில் ஈடுபட்டு வருகின்றனர். இதில் சேலம் மாவட்டத்தில் போட்டியிடும் திமுக மற்றும் அதன் கூட்டணி கட்சி வேட்பாளர்களை ஆதரித்து வரும் 28 ம் தேதி காங்கிரஸ் கட்சியின் முன்னாள் தலைவர் ராகுல் காந்தி மற்றும் திமுக தலைவர் ஸ்டாலின் மற்றும் கூட்டணி கட்சி தலைவர்கள் பங்கேற்கும் பிரமாண்ட தேர்தல் பிரச்சார பொதுக் கூட்டம் வருகின்ற 28 ஆம் தேதி சேலத்தில் நடைபெற உள்ளது.சேலம் உளுந்தூர்பேட்டை பிரதான சாலை அருகே உள்ள சீலநாயக்கன்பட்டி பகுதியில் நடைபெறும் பொதுக்கூட்டத்தில் மாவட்டம் முழுவதிலும் இருந்து ஆயிரக்கணக்கானோர் கலந்து கொள்வார்கள் என்பதால் கூட்டத்திற்கான முன்னேற்பாடு பணிகள் தீவிரமாக நடைபெற்று வருகிறது .
இதனை சேலம் வடக்கு சட்டமன்ற வேட்பாளர் ராஜேந்திரன் நேரில் பார்வையிட்டு ஆய்வு செய்தார். மேலும் பந்தல் அமைக்கும் பணியினை துரிதப்படுத்தவும் ஆலோசனைகளை வழங்கினார். மேலும் கூட்டணி கட்சி தலைவர்களும் இக்கூட்டத்தில் பங்கேற்க உள்ளது குறிப்பிடத்தக்கது.