கம்யூனிசம், லெனினிசம் புடைசூழ மம்தாவை மணந்த சோஷலிசம்: சேலத்தில் ஒரு புதுமை திருமணம்!

திருமணங்கள் சொர்க்கத்தில் நிச்சயிக்கப்படுகின்றன. ஆனால், நடப்பது என்னவோ, நம்மூரில் தான். திருமணங்களில் பல புதுமைகளை கண்டிருக்கிறோம். விண்ணில் பறந்தபடி திருமணம், தண்ணீருக்குள் திருமணம் என்று பல தினுசுகளை பார்த்திருக்கிறோம்.

ஆனால், மணப்பெண் தொடங்கி,  மணமகன், அவரது சகோதரர்கள் என குடும்பத்தினரின் பெயரில், கட்சி சிந்தாத்தங்களை கொண்ட நூதன பெயர்களை கொண்ட குடும்பத்தின் திருமணத்தை கேள்விப்பட்டிருகிறோமா? சேலத்தில் நடந்த கம்யூனிஸ்ட் கட்சி தீவிர பிரமுகரின் இல்லத்திருமணம் தான், தற்போது சோஷியல் மீடியாக்களில் ஹைலைட்டாக உள்ளது. 

சேலம் மாவட்டம், பனமரத்துப்பட்டி ஒன்றியத்திற்குட்பட்ட காட்டூர் பகுதியை சேர்ந்தவர் மோகன். இவர் இந்திய கம்யூனிஸ்ட் கட்சியின் மாவட்ட செயலாளராக உள்ளார். கட்சி மீதும் கொள்கை மீதும் கொண்ட பற்றால்,  தனது மூன்று மகன்களுக்கும் கம்யூனிசம், லெனினிசம், சோசலிசம், தனது பேரனுக்கு மார்க்சிசம் என, கட்சி சித்தாந்த பெயர்களைச் சூட்டி உள்ளார் .

இந்திய கம்யூனிஸ்ட் கட்சியின் மூத்த நிர்வாகிகள், பிரபலங்கள், கம்யூனிச நாடுகளில் இருந்து தலைவர்கள் என ஏராளமானோர் தொலைபேசி மூலம் வாழ்த்து தெரிவித்துள்ளதாக, மணமகனின் தந்தை மோகன், பெருமிதத்துடன் தெரிவித்தார்.