புதிய டாஸ்மாக் கடைக்கு எதிர்ப்பு தெரிவித்து மண்டியிட்டு நூதன ஆர்ப்பாட்டம்

சேலம் மெய்யனூரில் உள்ள இட்டேரி சாலையில் ஏற்கனவே ஒரு மதுபானக்கடை இருக்கும் நிலையில், கூடுதலாக புதிதாக டாஸ்மாக் கடை அமைப்பதற்கு எதிர்ப்பு தெரிவித்து மார்க்சிஸ்ட் கம்யூனிஸ்ட் கட்சியினர் மற்றும் இந்திய ஜனநாயக வாலிபர் சங்கத்தினர் பொதுமக்களுடன் இணைந்து மண்டியிட்டு நூதன முறையில் ஆர்ப்பாட்டத்தில் ஈடுபட்டனர்.

பொதுமக்கள் நடமாட்டம் மிகுந்த பகுதியில் மதுபானக்கடை திறப்பதால் குடியிருப்பு வாசிகளுக்கு பெரும் இடையூறு ஏற்படும், பள்ளி கல்லூரி மற்றும் அலுவலகங்களுக்கு செல்லும் பெண்களுக்கு போதிய பாதுகாப்பு இருக்காது எனவே புதிதாக டாஸ்மாக் மதுபானக் கடை திறக்க கூடாது என்று வலியுறுத்தி கண்டன கோசங்களை எழுப்பினர்.

 ஏற்கனவே கடந்த 13 ஆம் தேதி புதிய மதுபான கடை திறக்கும் திட்டத்தை கைவிட வலியுறுத்தி பொதுமக்களுடன் இணைந்து ஆர்ப்பாட்டத்தில் ஈடுபட்டபோது, இந்த பகுதியில் டாஸ்மாக் அமையாது என அரசு அதிகாரிகள் உறுத்தியளித்தனர்.

ஆனால் தற்போது கடை அமைக்கும் பணி தீவிரமாக நடைபெற்று வருகிறது என்று குற்றம் சாட்டிய அவர்கள், நாளை மதுபானங்களை கொண்டு வந்து இறக்கும் போது வாகனத்தை சிறைபிடித்து சட்டம் ஒழுங்கு பிரச்சனை ஏற்படும் அளவுக்கு போராட்டத்தில் ஈடுபடுவோம் என போராட்டத்தில் ஈடுபட்டவர்கள் எச்சரித்தனர்.