வாட்டி எடுத்த வெயில்; குமாரபாளையத்தில் பொதுமக்கள் அவதி

குமாரபாளையத்தில் வாட்டி எடுத்த வெயிலால் பொதுமக்கள் கடும் அவதிக்குள்ளாகினர்.

ஏப்ரல், மே மாத 15 தேதி வரை, கடும் வெயில் பொதுமக்களை வாட்டி வதைத்து வந்தது. கடந்த சில நாட்களாக மழை பெய்ததால் வெப்பத்தின் தாக்கம் குறைந்து, குளிர்ச்சி நிலவியது. நேற்று மீண்டும் வெயிலின் தாக்கம் அதிகரித்தது. இதனால் குழந்தைகள் முதல் பெரியவர்கள் வரை பெரும் சிரமத்திற்கு ஆளாகினர். சாலையில் மக்கள் நடமாட்டமின்றி வெறிச்சோடி காணப்பட்டது.

வெயிலின் தாக்கத்தால் சாலையோர வியாபாரிகள் துன்பப்பட்ட நிலையில், போதிய வியாபாரமும் இல்லாமல் தவிப்புக்குள்ளாகினர். கட்டுமான தொழிலாளர்கள், தள்ளுவண்டி வியாபாரிகள், சுமை தூக்குவோர், காய்கறி, பழங்கள் விற்கும் தலைச்சுமை வியாபாரிகள் கடும் வெயிலால் துன்பத்திற்கு ஆளாகினர்.

குமாரபாளையம் மற்றும் சுற்றுப்பகுதியில் கடந்த மாதங்களில் வெயில் வெளுத்து வாங்கியது. அரசியல்வாதிகள் கடும் வெயிலையும் பொருட்படுத்தாது தீவிர பிரச்சாரம் செய்து வந்தனர். கடும் வெயில் நேரத்திலும் கட்சி தலைவர்கள் சளைக்காமல் பிரச்சாரம் செய்தனர். கட்சி தொண்டர்கள், மகளிரணியினர் வீதி, வீதியாக கொடிகளை பிடித்தவாறு சென்று ஆதரவு திரட்டினர்.

மேலும் வருவாய்த்துறையினர், ஓட்டுச்சாவடி அலுவலர்களுக்கு பயிற்சி வழங்குதல், ஓட்டுச்சாவடிகளை தயார் நிலையில் வைத்திருத்தல், ஓட்டுப்பதிவு மெசின்கள் எடுத்து வந்து பாதுக்காப்பாக வைத்திருத்தல், சம்பந்தபட்ட ஓட்டுச்சாவடி அலுவலர்கள் வசம் மெசின்களை ஒப்படைத்தல், ஓட்டுச்சாவடி எல்லையில் கோடிட்டு வைத்தல், உள்ளிட்ட பல பணிகளை வெயிலின் தாக்கம் இருந்தும் சலிக்காமல் செய்தனர். டி.ஐ.ஜி, எஸ்.பி., டி.எஸ்.பி. உள்ளிட்ட போலீசாரும் பாதுகாப்பு பணிகள் மேற்கொண்டனர்.

கடும்கோடை வெப்பத்தில் அனைத்து தரப்பினரும் களைப்பு நீங்கிட, இளநீர், தர்பூசணி, கரும்பு சாறு, பழச்சாறு, உள்ளிட்ட கடைகளில் திரண்டனர். இளநீர், பழங்கள் விலை அதிகம் என்பதால், விலை குறைவான கரும்பு சாறு கடைகளுக்கு பொதுமக்கள் அதிகம் வந்துகொண்டுள்ளனர். வழக்கமாக இருந்த கரும்பு சாறு கடைகளை விட தற்போது எண்ணிக்கையில் அதிகம் காணப்படுகிறது.

இது குறித்து கரும்பு சாறு கடை வியாபாரிகள் கூறியதாவது,

இந்த ஆண்டு வெயிலின் தாக்கம் அதிகம் என்பதால், விலை குறைவான கரும்பு சாறு கடைகளுக்கு அதிகம் வருகின்றனர். இதனால் கரும்பு சாறு கடையினர் மகிழ்ச்சியடைந்தனர்.

இவ்வாறு அவர்கள் கூறினர்.