நீர் தெளிப்பான் அமைக்கப்பட்ட முதியோர் இல்லம்..!

குமாரபாளையத்தில் உள்ள முதியோர் இல்லத்தில் மேற்பகுதியில் நீர் தெளிப்பான் அமைக்கப்பட்டுள்ளது.

குமாரபாளையம் ராஜம் தியேட்டர் பின்புறம் ஓலப்பாளையம் பகுதியில் பாசம் முதியோர் இல்லம் உள்ளது. இதில் சுமார் 30க்கும் மேற்பட்ட முதியவர்கள், ஆதரவற்றவர்களை வைத்து அதன் நிறுவனர் குமார் காத்து வருகிறார். கடும் கோடை வெப்பம் அனைவரையும் அவதிக்கு ஆளாக்கி வருகிறது.

இந்த இல்லத்தின் மேற்பரப்பு சிமெண்ட் அட்டை என்பதால், வெப்பத்தின் தாக்கம் அதிக சிரமத்தை ஏற்படுத்தி வந்தது. முதியவர்களின் துயரம் போக்க, சிமெண்ட் அட்டை மேல், தென்னங்கீற்று போட்டு, அதன் மீது, 6 நீர் தெளிப்பான்களை அமைத்துள்ளார். இதனால், இங்குள்ள முதியவர்கள் வெப்பத்தின் தாக்குதலிலிருந்து விடுபட்டு, குளிர்ச்சியான நிலையில் வசித்து வருகின்றனர். முதியர்களின் வெப்ப கொடுமையிலிருந்து காக்க, நீர் தெளிப்பான் அமைத்த, நிறுவனர் குமாரை பல தரப்பினரும் பாராட்டி வருகின்றனர்.

இது குறித்து முதியவர் ராஜ் கூறியதாவது:

கோடை வெப்பத்தின் தாக்கம் எங்களை மிகவும் அவதிக்குள்ளாக்கி வந்தது. இந்த மையத்தை நடத்தி வர, அரும்பாடுபட்டு வரும் குமார், தற்போது, எங்கள் துயரம் போக்க, நீர் தெளிப்பான்கள் அமைத்து, குளிர்ச்சியான நிலையை உருவாக்கியுள்ளார். இப்போது ஏதோ ஏசியில் இருப்பது போல சிலு சிலுவென்று இருக்கிறது. தற்போது நாங்கள் வெப்பத்தின் தாக்குதல் இல்லாமல் இருந்து வருகிறோம். இவ்வாறு அவர் கூறினார்.